चीनमा १९ सिटे विद्युतीय विमानको पहिलो मानवसहित परीक्षण उडान सफल

काठमाडौं । अब विद्युतीय गाडी मात्रै होइन, विद्युतीय विमानबाट पनि यात्रा गर्ने दिन नजिकिँदै छ । चीनले १९ जनासम्म यात्रु बोक्न सक्ने विद्युतीय यात्रुवाहक विमानको पहिलो मानवसहितको परीक्षण उडान सफलतापूर्वक सम्पन्न गरेको छ । चीनको घरेलु प्रविधिमा आधारित सीई–२५ए नामक उक्त विमानले शनिबार नोभेम्बर १४ मा शान्दोङ प्रान्तको बिन्झाउबाट पहिलो पटक चालक दलसहित उडान भरेको हो । चाइना कमर्सियल एयरक्राफ्ट कर्पोरेसन (कोम्याक)का अनुसार परीक्षण उडानमा दुई जना पाइलट र एक जना उडान परीक्षण इन्जिनियर सवार थिए । उडानका क्रममा विमानका सबै प्रमुख प्रणाली सामान्य रूपमा सञ्चालन भएका थिए भने कार्यसम्पादनका सूचकहरू पनि निर्धारित लक्ष्यअनुरूप रहेको कम्पनीले जनाएको छ । छोटो दूरीका सहरबीच यात्रु ओसारपसार गर्ने उद्देश्यले विकास गरिएको यो विमानमा एकपटकमा १९ जनासम्म यात्रु यात्रा गर्न सक्छन् । यसको अधिकतम उडान तौल १० टन रहेको छ भने प्रतिघण्टा ३०० किलोमिटरको गतिमा उड्न सक्छ । त्यस्तै, यसको उडान क्षमता ४०० किलोमिटर र उडान उचाइ करिब २ हजार ४ सय मिटर रहेको छ । यसअघि सीई–२५एले सन् २०२६ फेब्रुअरी २ मा पहिलो मानवरहित परीक्षण उडान गरेको थियो । त्यसपछि चालक दलबिनै १९ पटकसम्म परीक्षण उडान सम्पन्न गरेपछि अहिले मानवसहितको उडान गरिएको हो । कोम्याकले विभिन्न अनुसन्धान तथा औद्योगिक साझेदारसँगको सहकार्यमा विकास गरेको यो विमान चीनको पहिलो विद्युतीय व्यावसायिक विमान हो । परियोजनामा ब्याट्री निर्माता कम्पनी सीएटीएल र सांघाई जियाओ टोङ विश्वविद्यालयलगायतका संस्थाको सहभागिता रहेको छ । यसैबीच, विमानले व्यावसायिक उडानको अनुमति पाउन आवश्यक प्रमाणीकरण प्रक्रिया पनि अघि बढाएको छ । चीनको नागरिक उड्डयन प्रशासनले यसको टाइप सर्टिफिकेटका लागि दिएको आवेदन स्वीकार गरिसकेको छ । यद्यपि, विमानले व्यावसायिक उडान सञ्चालन गर्ने अन्तिम अनुमति भने पाइसकेको छैन ।