गीतकार सरिता घिमिरेले ल्याइन् तिहार कोसेली ‘सजाएर टिका थाली’ [भिडियोसहित]

काठमाडौं । गीतकार सरिता घिमिरेले नेपालीहरूको दोस्रो ठूलो चाड तिहार नजिकिँदै गर्दा तिहार विशेष गीत ‘सजाएर टिका थाली’ ल्याएकी छन् । दाजुभाइ तथा दिदीबहिनीबीचको आत्मीयता, प्रेम र तिहारको सांस्कृतिक महत्त्वलाई समेटेर तयार पारिएको गीतलाई उनले यस वर्षको तिहार कोसेलीका रूपमा दर्शकमाझ ल्याएकी हुन् । गीतमा शक्ति बल्लभको संगीत तथा बनिका प्रधानको स्वर रहेको छ । तिहारमा दिदीबहिनीले दाजुभाइका लागि तयार पार्ने सप्तरङ्गी टीका, मखमली र सयपत्री फूलको माला तथा स्नेह र आत्मीयताको भावलाई गीतले समेटेको छ । गीतको भिडियोमा अभिनेत्री रजनी केसी र कमल सिंहको अभिनय देख्न सकिन्छ । जीवन शाहीको कथा तथा निर्देशनमा तयार भएको भिडियोमा रेशम दर्लामीको छायांकन र विश्वराम खड्काको सम्पादन तथा कलर संयोजन रहेको छ । मनोहर सुनामको संगीत संयोजन रहेको गीतको रेकर्डिङ, मिक्सिङ तथा मास्टरिङ भोला पौडेलले गरेका हुन् । तिहारको उल्लास, दाजुभाइ तथा दिदीबहिनीबीचको आत्मीयता र नेपाली मौलिक संस्कृतिलाई संगीतमार्फत प्रस्तुत गर्ने उद्देश्यसहित ल्याइएको ‘सजाएर टिका थाली’ले छाेटाेसमयमै दर्शक तथा स्रोताको मन जित्न सफल भएकाे छ ।