गायिकाको आपत्तिजनक भिडिओ सार्वजनिक गरेको आरोपमा कलाकार पक्राउ

काठमाडौं । एक गायिकाको चरित्रहत्या गर्ने उद्देश्यले सामाजिक सञ्जालमा आपत्तिजनक भिडिओ सार्वजनिक गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा करिब ३५ वर्षीय कलाकार खगेन्द्र न्यौपाने रहेका छन् । जिल्ला प्रहरी कार्यालय कालिकोटका सूचना अधिकारी प्रहरी निरीक्षक वर्मा यादवका अनुसार उनलाई काठमाडौंमा नियन्त्रणमा लिएर थप अनुसन्धान तथा कारबाहीका लागि कालिकोट लगिएको छ । प्रहरीका अनुसार सामाजिक सञ्जालमा अहिले फैलिएको उक्त भिडिओ करिब अढाई वर्ष पुरानो हो । भिडिओ गायिका नाबालिग रहेको समयमा रेकर्ड गरिएको प्रारम्भिक अनुसन्धानबाट खुलेको प्रहरी निरीक्षक यादवले बताए । पीडित गायिकाले सामाजिक सञ्जालमार्फत आफ्नो धारणा सार्वजनिक गर्दै आफू नाबालिग हुँदा आफ्नो बालमस्तिष्कको दुरुपयोग गरी उक्त सामग्री तयार पारिएको दाबी गरेकी छन् । उनले घटनाका कारण आफू गम्भीर मानसिक तनावमा परेको उल्लेख गर्दै आफ्नो कलाकारिता र भविष्य समाप्त पार्ने उद्देश्यले सामग्री फैलाइएको बताएकी छन् । मुख्य आरोपी पक्राउ परिसकेको जानकारी पाएको भन्दै उनले विगतको घटनामा आफूबाट समेत कमजोरी भएको स्वीकार गरेकी छन् । साथै, घटनालाई थप फैलाउन सहयोग पुग्ने गरी सामाजिक सञ्जालमा सामग्री शेयर, कमेन्ट वा प्रसार नगर्न उनले आग्रह गरेकी छन् ।