एपेक बैठकको ‘साइडलाइन’मा ट्रम्प, सी र पुटिनबीच ‘त्रिपक्षीय भेटवार्ता हुने’

काठमाडौं । अमेरिकी राष्ट्रपति डोनाल्ड ट्रम्प, रुसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङबीच आउँदो साता चीनको सेन्जेनमा एसिया–प्रशान्त आर्थिक सहयोग (एपेक) शिखर सम्मेलनको ‘साइडलाइन’मा भेटवार्ता हुने ह्वाइट हाउसले जनाएको छ । चिनियाँ विदेश मन्त्रालयले यसबारे सम्बन्धित पक्षसँग सम्पर्क भइरहेको जनाएको छ । रुसी अधिकारीले पनि भेटवार्ताका निम्ति समन्वय भइरहेको बताएका छन् । तीन शक्तिराष्ट्रका नेताबीच हुन लागेको यो भेटलाई महत्त्वपूर्ण कूटनीतिक घटनाका रूपमा हेरिएको छ । तर, विश्लेषकले ठोस सहमतिको सम्भावना कम रहेको बताएका छन् । बैठकको उपलब्धिभन्दा प्रतीकात्मक महत्त्व बढी हुने उनीहरूको भनाइ छ । तीन देशबीचको सम्बन्ध जटिल बनिरहेका बेला यो भेट हुन लागेको हो । गत वर्ष व्यापार सम्झौतापछि ट्रम्प र सीबीच सौहार्दपूर्ण भेट भएको थियो । इरान युद्धलगायत विषयमा मतभेद रहे पनि दुई नेताबीच सम्बन्धमा केही न्यानोपन देखिएको थियो । ट्रम्पले पुटिनसँग पनि सम्बन्ध सुधार्ने प्रयास गरेका छन् । तर, पुटिन युक्रेनसँगको झन्डै पाँच वर्ष पुरानो युद्धमा आफ्नो अडानबाट पछि हटेका छैनन् । यसबीच रुसले इरानसँग सैन्य, गुप्तचर र कूटनीतिक सहकार्य विस्तार गरेको छ । ट्रम्पले प्रस्तावित भेटमा इरानसँगको अमेरिकी युद्ध र तीन देशका परमाणु हतियार भण्डारबारे छलफल हुन सक्ने बताएका छन् । एक वरिष्ठ अमेरिकी अधिकारीले ट्रम्पले सी र पुटिनसँग इरान युद्धबारे छलफल गर्ने तर युक्रेनको विषय नउठाउने बताएका समाचार संस्था एपीले जनाएको छ । ती अधिकारीका अनुसार, बैठकको उद्देश्य परमाणु निःशस्त्रीकरणबारे भविष्यमा सार्थक वार्ताको आधार तयार गर्नु हो । यद्यपि, बैठकबाट कुनै सम्झौता घोषणा हुने अपेक्षा नरहेको उनले स्पष्ट पारे ।