Tuesday, November 17, 2026||
MultiKhabarMultiKhabar

एपस्टिनको आत्महत्या नभई हत्या भएको फरेन्सिक विज्ञको दाबी

Share:WhatsAppFacebookX (Twitter)Telegram
एपस्टिनको आत्महत्या नभई हत्या भएको फरेन्सिक विज्ञको दाबी
Photo / Coverage: केन्द्रबिन्दु

काठमाडौं । अमेरिकाका कुख्यात यौन अपराधी जेफ्री एपस्टिनको जेलभित्र भएको मृत्यु आत्महत्या नभई हत्या भएको हुन सक्ने एक फरेन्सिक विज्ञले दाबी गरेका छन् । सन् २०१९ मा एपस्टिनको मृत्यु आत्महत्या भएको निष्कर्ष निकालिएको भए पनि नयाँ विश्लेषणले उनको हत्या भएको संकेत गर्ने प्रमाणहरू देखाएको विज्ञको भनाइ छ । हत्यासम्बन्धी घटनाको अध्ययन गर्दै आएका फरेन्सिक वैज्ञानिक प्राध्यापक माइकल फ्रिम्यानले न्युयोर्क सिटी मेडिकल एक्जामिनरको पोस्टमार्टमसम्बन्धी फाइल र तस्बिरहरूको अध्ययनपछि एपस्टिनको घाँटी थिचेर हत्या गरिएको हुन सक्ने निष्कर्ष निकालेका हुन् । बीबीसीसँग कुरा गर्दै फ्रिम्यानले एपस्टिनलाई सम्भवतः पछाडिबाट कुनै वस्तु प्रयोग गरी घाँटी थिचिएको र त्यसपछि त्यही वस्तु प्रयोग गरेर शवलाई खाटमा झुन्ड्याइएको हुन सक्ने बताए । उनले एपस्टिनको बायाँ काँधमा गहिरो रक्तस्राव, अनुहारमा प्रहार भएको जस्तो देखिने चोट तथा घाँटीको डोरीको डाममाथि नङले कोतरेको जस्तो चिह्न रहेको उल्लेख गरेका छन् । फ्रिम्यानका अनुसार यी चोटहरू घाँटी थिचेर हत्या गरिएको घटनासँग मेल खान्छन् । उनले शव भेटिएको अवस्था र शरीरमा देखिएका चोटबीच तालमेल नभएको भन्दै मृत्युको कारण हत्या हुन सक्ने तर्क गरेका छन् । तर, सन् २०१९ मा एपस्टिनको पोस्टमार्टम गरेकी तत्कालीन प्रमुख मेडिकल एक्जामिनर डा. बारबरा साम्पसनले भने उनको मृत्यु झुन्डिएर आत्महत्या गर्दा देखिने चोटसँग मेल खाने निष्कर्ष निकालेकी थिइन् । उनले घाँटी थिचेर हत्या गरिएका व्यक्तिमा देखिने प्रतिरक्षात्मक चोटहरू एपस्टिनको शरीरमा नदेखिएको बताएकी थिइन् । साम्पसनले यसअघि आफ्नो निष्कर्षमा दृढ रहेको प्रतिक्रिया दिएकी थिइन् । फ्रिम्यानले एपस्टिनको शव प्रत्यक्ष रूपमा नहेरेको र उनका भाइ मार्क एपस्टिनले उपलब्ध गराएका पोस्टमार्टम फाइल तथा तस्बिरका आधारमा विश्लेषण गरेको बताएका छन् । उनले आफ्नो अनुसन्धानका लागि मार्कबाट कुनै पारिश्रमिक नलिएको दाबी गरेका छन् । यद्यपि, उनको अनुसन्धान अझै विज्ञहरूबाट सहकर्मी समीक्षा अर्थात् ‘पियर रिभ्यु’ भएको छैन । अमेरिकी न्याय विभागको महानिरीक्षक कार्यालयले गरेको अनुसन्धानले भने एपस्टिनको मृत्यु आत्महत्या भएको निष्कर्षलाई समर्थन गरेको थियो । जेलका सुरक्षाकर्मीले उनलाई झुन्डिएको अवस्थामा भेटेपछि शरीर तल झारेको र पुनर्जीवन दिने प्रयास गरेको प्रतिवेदनमा उल्लेख छ । एपस्टिन सन् २०१९ अगस्ट १० मा न्युयोर्कस्थित मेट्रोपोलिटन करेक्सनल सेन्टरमा मृत फेला परेका थिए । नाबालिग किशोरीहरूको यौन तस्करीसम्बन्धी मुद्दामा सुनुवाइको प्रतीक्षामा रहेका उनी यसअघि सन् २००८ मा नाबालिगसँग यौनसम्बन्धी अपराधमा दोषी ठहर भएका थिए । -बीबीसी

Share:WhatsAppFacebookX (Twitter)Telegram

Read Complete Original Article

Published originally on केन्द्रबिन्दु

Visit Publisher Site →

Related News

🇳🇵 Nepal
करको दर होइन, आर्थिक गतिविधि बढाउनुपर्छ : मुख्यमन्त्री थापामगर
Latest NewsJust now

करको दर होइन, आर्थिक गतिविधि बढाउनुपर्छ : मुख्यमन्त्री थापामगर

मकवानपुर – बागमती प्रदेशका मुख्यमन्त्री किरण थापा मगरले करको दर बढाएर मात्र राज्यको राजस्व वृद्धि सम्भव नहुने बताएका छन् । उनले उत्पादन, लगानी, रोजगारी र आर्थिक गतिविधि विस्तार गरी करको दायरा फराकिलो बनाउनुपर्नेमा जोड दिए । राष्ट्रिय कर दिवस २०८३ का अवसरमा मंगलबार आन्तरिक राजस्व कार्यालय हेटौँडाले आयोजना गरेको कार्यक्रममा मुख्यमन्त्री थापामगरले कर प्रणालीलाई न्यायपूर्ण, […] ...

काठमाण्डुपाटी
पारस खड्का क्यूजे मोटर नेपालको ब्रान्ड एम्बेसडर नियुक्त
Latest NewsJust now

पारस खड्का क्यूजे मोटर नेपालको ब्रान्ड एम्बेसडर नियुक्त

क्यूजे मोटर सन् १९५५ मा गिली ग्रुपअन्तर्गत स्थापित ब्रान्ड हो। कम्पनीले इन्जिनियरिङ, नवीनता र गुणस्तरीय उत्पादनका लागि अन्तर्राष्ट्रिय बजारमा आफ्नो पहिचान बनाएको जनाएको छ। ...

कान्तिपुर
Multikhabar App

All Information In One Place

Real-time headlines from trusted sources. Get the app now — stay updated, inspired, and ahead with breaking news!

Get it on Google Play