काठमाडौं। नेपाल प्रिमियर लिग (एनपीएल) को तेस्रो संस्करणमा बलरहरू हाबी देखिएका छन्। समूह चरणका खेलहरू सकिँदा नेपाली र विदेशी बलरहरूबीच कडा प्रतिस्पर्धा देखिएको छ। प्रतियोगितामा चार जना बलरले सर्वाधिक १२-१२ विकेट लिएका छन्, जसमा तीन जना नेपाली खेलाडी छन्। जनकपुर बोल्ट्सका राहुल यादव, चितवन राइनोजका कमलसिंह ऐरी र रिजन ढकाल तथा काठमान्डु गोर्खाजका पाकिस्तानी खेलाडी जहानदाद खानले समान १२ विकेट लिएका छन्। कमलसिंह ऐरीले सबैभन्दा कम पाँच खेलमा यो उपलब्धि हासिल गरेका हुन्। राहुल यादवले सात खेलमा १२ विकेट लिँदै प्रतियोगिताको ‘सरप्राइज प्याकेज’ बनेका छन्। रिजन ढकालले छ खेलमा १२ विकेट लिएका छन् भने जहानदाद खानले सात खेलमा समान १२ विकेट पूरा गरेका छन्। त्यसैगरी, जनकपुरका हरमीत सिंह र कर्णाली याक्सका मार्क वाटले ११-११ विकेट हात पारेका छन्। हरमीत सिंहको इकोनोमी ५.६६ रहेको छ, जुन शीर्ष बलरहरूमध्ये सबैभन्दा किफायती हो। १० विकेट लिने खेलाडीहरूको सूचीमा सुदूरपश्चिम रोयल्सका अनिल खरेल, कर्णाली याक्सका हुसैन तलात र सोमपाल कामी रहेका छन्। अनिल खरेलले छ खेलमा १० विकेट लिँदै ९.१० को बलिङ औसत कायम गरेका छन्। नौ विकेट लिने खेलाडीहरूमा लुम्बिनी लायन्सका शेर मल्ल, पोखरा एभेन्जर्सका विपिन खत्री र सुदूरपश्चिमका स्कट कुगलेइन रहेका छन्। समूह चरणको तथ्यांक हेर्दा सर्वाधिक विकेट लिने शीर्ष १० बलरमध्ये ६ जना नेपाली खेलाडी छन्। यसले राष्ट्रिय टोलीका लागि नयाँ विकल्पहरू तयार भइरहेको संकेत गरेको छ।
एनपीएल समूह चरण: सर्वाधिक विकेट लिने १२ बलरमा ७ नेपाली

Read Complete Original Article
Published originally on नेपालन्युज





