एनपीएल : सन्दीप लामिछानेको ह्याट्रिकसहित लिए ६ विकेट

काठमाडौं । विराटनगर किंग्सका कप्तान सन्दीप लामिछानेले नेपाल प्रिमियर लिग (एनपीएल) को तेस्रो संस्करणमा उत्कृष्ट बलिङ गर्दै ह्याट्रिकसहित ६ विकेट लिएका छन्। पोखरा एभेन्जर्सविरुद्धको खेलमा सन्दीपले ३ ओभरमा २३ रन खर्चेर ६ विकेट लिएका हुन्। उनको उत्कृष्ट बलिङसँगै पोखराको मध्यक्रम ध्वस्त भएको छ। सन्दीपले खेलको १५औँ ओभरको तेस्रो, चौथो र पाँचौँ बलमा लगातार तीन विकेट लिँदै ह्याट्रिक पूरा गरेका थिए। यससँगै उनी जारी सिजनमा एकै खेलमा ६ विकेट लिने पहिलो बलर बनेका छन्। यसअघि खेलेका पाँच खेलमा एक विकेट मात्रै लिएका सन्दीपले छैटौँ खेलमा भने असाधारण प्रदर्शन गरेका हुन्। सन्दीप एनपीएलमा ह्याट्रिक विकेट लिने चौथो खेलाडीसमेत बनेका छन्। यसअघि विराटनगरकै प्रतिश जिसी, काठमाडौं गोर्खाजका शाहब आलम र लुम्बिनी लायन्सका कप्तान रोहित पौडेलले ह्याट्रिक विकेट लिइसकेका छन्। यसअघि शाहब आलम र कर्णाली याक्सका विलियम बोसिस्टोले पनि एकै खेलमा ६ विकेट लिएका थिए। सन्दीपको यो प्रदर्शनले जारी प्रतियोगितामा उत्कृष्ट व्यक्तिगत बलिङ प्रदर्शनको सूचीमा अर्को कीर्तिमान थपेको छ।