एनपीएल खेल्न काठमाडौं आइपुगे डेभिड वार्नर

काठमाडौं । अस्ट्रेलियाका स्टार क्रिकेटर डेभिड वार्नर जारी नेपाल प्रिमियर लिग (एनपीएल) खेल्न काठमाडौं आइपुगेका छन्। एनपीएल तेस्रो संस्करणका लागि काठमाडौं गोर्खाजमा अनुबन्धित उनी आइतबार राति काठमाडौंस्थित त्रिभुवन अन्तर्राष्ट्रिय विमानस्थल ओर्लिएका हुन्। वार्नर अब आज (सोमबार) काठमाडौँ गोर्खाजका तर्फबाट कीर्तिपुरस्थित त्रिवि क्रिकेट मैदान उत्रनेछन्। आजको पहिलो खेलमा काठमाडौं गोर्खाज र कर्णाली याक्स भिड्दै छन्। खेल दिउँसो साढे १२ बजे सुरु हुनेछ। अस्ट्रेलियाले सन् २०१५ र २०२३ मा एकदिवसीय विश्वकप र सन् २०२१ मा टी-२० विश्वकप जित्दा वार्नर टोलीका प्रमुख सदस्य थिए। यस्तै, सन् २०२१ को टी-२० विश्वकपमा उनी ‘प्लेयर अफ द सिरिज’ मा चुनिएका थिए। वार्नरले अस्ट्रेलियाबाट ११२ टेस्ट, १६१ एकदिवसीय अन्तर्राष्ट्रिय र ११० टी-२० अन्तर्राष्ट्रिय खेल्दै ४९ शतकसहित झन्डै १९ हजार रन बनाएका छन्। वार्नरले १४२ माथिको स्ट्राइक रेटमा टी-२० क्रिकेटमा तीन हजार २७७ रन बनाएका छन्। उनको नाममा आठ हजार ७८६ टेस्ट र ६ हजार ९३२ एकदिवसीय रन छ। उनले पछिल्लोपटक अस्ट्रेलियाबाट सन् २०२४ मा अमेरिका र वेस्ट इन्डिजमा भएको टी-२० विश्वकपमा खेलेका थिए। सन् २०१९ मा पाकिस्तानविरुद्ध एडिलेडमा अविजित ३३५ रन बनाएका थिए। आज कर्णालीविरुद्ध मैदान उत्रँदा काठमाडौं गोर्खाज जारी प्रतियोगितामा पहिलो जित हासिल गर्ने दाउमा हुनेछ। यसअघि खेलेको एक मात्र खेलमा काठमाडौं जनकपुर बोल्ट्ससँग ८ विकेटले हारेको छ। आज कर्णालीविरुद्धको यो खेल काठमाडौंका लागि प्रतियोगितामा पुनरागमन गर्ने महत्त्वपूर्ण अवसर हुनेछ। यसका लागि विश्वस्तरीय ब्याटर वार्नर काठमाडौंगोर्खाज टोलीको मनोबल उच्च बनाउने अपेक्षा गरिएको छ।