काठमाडौं । नेपाल प्रिमियर लिग (एनपीएल) क्रिकेटका खेलमा अनलाइनमार्फत सट्टेबाजी गरेको आरोपमा एक भारतीय नागरिक पक्राउ परेका छन्। पक्राउ पर्नेमा भारतको राजस्थान राज्यस्थित श्रीगंगानगरका ३५ वर्षीय रोहित पथरिया रहेका छन्। काठमाडौं उपत्यका अपराध अनुसन्धान कार्यालयको टोलीले उनलाई काठमाडौं महानगरपालिका–१७, ठमेलबाट पक्राउ गरेको हो। उनी ठमेलमा बस्दै आएका थिए। कार्यालयका अनुसार कीर्तिपुरस्थित त्रिवि क्रिकेट मैदानमा सञ्चालन भइरहेको एनपीएलको तेस्रो संस्करणका खेलमा केही व्यक्तिले अनलाइनमार्फत सट्टेबाजी गर्ने तथा गराउने गरेको सूचनाका आधारमा अनुसन्धान अघि बढाइएको थियो। सोही क्रममा पक्राउ परेका पथरियाको साथबाट दुई थान मोबाइल बरामद गरिएको थियो। मोबाइल जाँच गर्दा उनले विभिन्न अनलाइन बेटिङ साइटमा लगइन गरी एनपीएलका खेलमा पटक–पटक सट्टेबाजी गरेको खुलेको कार्यालयले जनाएको छ। प्रारम्भिक अनुसन्धानअनुसार पथरियाले अनलाइन सट्टेबाजीमार्फत ८ लाख ७५ हजार ४० रुपैयाँ बराबरको कारोबार गरेको पाइएको छ।
एनपीएलमा सट्टेबाजी गरेको आरोपमा ठमेलबाट एकजना पक्राउ

Read Complete Original Article
Published originally on केन्द्रबिन्दु






