एनपिएल : काठमान्डुले पहिलो इलिमिनेटरमा चितवनसँग खेल्ने

काठमाडौं । कुशल भुर्तेल र युवराज सिंह साम्राको आक्रामक ब्याटिङ तथा दिनेश खरेलको घातक बलिङप्रेरित पोखरा एभेन्जर्सले नेपाल प्रिमियर लिग (एनपिएल) मा काठमान्डु गोर्खाजलाई ५५ रनले पराजित गरेको छ । आइतबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको लिग चरणको अन्तिम खेलमा पोखराले कीर्तिमानी प्रदर्शन गर्दै सानदार जित निकालेको हो । टस हारेर पहिले ब्याटिङ गरेको पोखरा एभेन्जर्सले निर्धारित २० ओभरमा तीन विकेट गुमाउँदै २२४ रन बनायो । यो एनपिएल इतिहासकै अहिलेसम्मको ठूलो योगफल हो । पोखरालाई विशाल योगफलसम्म पुर्‍याउने क्रममा कुशल भुर्तेल र युवराज सिंह साम्राले दोस्रो विकेटका लागि १८६ रनको कीर्तिमानी साझेदारी गर्नुभएको थियो । उहाँहरूको साझेदारी एनपिएल इतिहासकै सबैभन्दा ठूलो साझेदारीसमेत बन्यो । कुशल शतक बनाउन एक रनले चुक्नुभयो । उहाँले ५० बलमा आठ छक्का र आठ चौकाको मद्दतले ९९ रन बनाउनुभयो । यस्तै युवराजले ५५ बलमा पाँच छक्का र आठ चौका प्रहार गर्दै ८९ रनको उत्कृष्ट इनिङ्स खेल्नुभयो । काठमान्डुका कप्तान करण केसीले दुई तथा जहनदाद खानले एक विकेट लिनुभयो । २२५ रनको विशाल लक्ष्य पछ्याएको काठमान्डु गोर्खाजले १९ ओभरमा सबै विकेट गुमाउँदै १६९ रन मात्रै बनाउन सक्यो । काठमान्डुका लागि साहिल पटेलले २३ बलमा एक छक्का र चार चौकासहित ३४ रन बनाउनुभयो । राशिद खानले २० बलमा दुई छक्का र तीन चौकाको मद्दतले ३१ रन जोड्नुभयो । त्यस्तै सोनु देवकोटाले १४ बलमा चार छक्कासहित २९, विलियम बोसिस्टोले २२ बलमा एक छक्का र तीन चौकासहित २६ तथा जहनदाद खानले १२ बलमा तीन छक्का प्रहार गर्दै २४ रन बनाउनुभयो । तर, उहाँहरूको प्रयास टोलीलाई जित दिलाउन पर्याप्त भएन । यस जितसँगै पोखराले सात खेलबाट चार अंक जोड्दै तेस्रो संस्करणको एनपिएल यात्रा टुंग्याएको छ । उता, काठमान्डु गोर्खाज पोखरासँग पराजित भएसँगै सुदूरपश्चिम रोयल्स पहिलो क्वालिफायरमा पुग्न सफल भएको छ । सात खेलबाट १० अंक जोडेको सुदूरपश्चिम दोस्रो स्थानमा रहँदा आठ अंकसहित काठमान्डु तेस्रो स्थानमा छ । अब काठमान्डुले पहिलो इलिमिनेटरमा चितवन राइनोजसँग प्रतिस्पर्धा गर्नेछ । पहिलो क्वालिफायरमा भने शीर्ष स्थानको लुम्बिनी लायन्स र सुदूरपश्चिम रोयल्स भिड्नेछन् । पहिलो क्वालिफायरको विजेता सिधै फाइनलमा प्रवेश गर्नेछ भने पराजित टोलीले दोस्रो क्वालिफायर खेल्नेछ । यस्तै, इलिमिनेटरको विजेताले पहिलो क्वालिफायरमा पराजित हुने टोलीसँग दोस्रो क्वालिफायरमा प्रतिस्पर्धा गर्नेछ । कर्णाली याक्स २४ रनले विजयीआइतबार नै भएको एनपिएलको पहिलो खेलमा कर्णाली याक्सले चितवन राइनोजलाई २४ रनले पराजित गरेको थियो । कीर्तिपुरस्थित त्रिवि क्रिकेट मैदानमा कर्णालीले दिएको १५४ रनको लक्ष्य पछ्याएको चितवन १९.१ ओभरमा १२९ रनमै अलआउट भयो । यससँगै कर्णालीले लिग चरणको अन्तिम खेलमा जित निकाल्दै प्रतियोगिताको सुखद अन्त्य गरेको छ । कर्णालीका लागि ब्याटिङमा अविजित अर्धशतक बनाउनुभएका हुसेन तलतले बलिङमा पनि उत्कृष्ट प्रदर्शन गर्दै तीन विकेट लिनुभयो । उहाँले ३.१ ओभरमा १७ रन खर्चिएर तीन विकेट लिनुभएको थियो । चितवनका लागि एनपिएलमा डेब्यु गर्नुभएका उसामा मिरले अविजित २८ रन बनाए पनि टोलीलाई जित दिलाउन सक्नुभएन । उहाँले २३ बलमा दुई चौका र एक छक्का प्रहार गर्नुभयो । ओपनर कमिल मिशाराले १७ बलमा दुई चौका र दुई छक्कासहित २५ रन बनाउनुभयो भने देव खनालले १४ रन जोडनुभयो । कमिल र देवले पहिलो विकेटका लागि ३५ रनको साझेदारी गर्दै चितवनलाई राम्रो सुरुवात दिलाउनुभएको थियो । तर, त्यसपछि चितवनको ब्याटिङ सम्हालिन सकेन । कप्तान सिकन्दर राजा दुई, विवेक यादव ६ र डान मोस्ली आठ रनमा आउट हुनुभयो । चितवनले ६४ रन जोड्दा पाँच विकेट गुमाइसकेको थियो । कुशल मल्लले १५ बलमा एक चौका र एक छक्कासहित १८ रन बनाउनुभयो । सलाउद्दिन खान सात तथा यस सिजनको पहिलो खेल खेलेका अशोक धामी ११ रनमा आउट हुनुभयो । कमल सिंह ऐरी र रिजन ढकालले समान एक रन बनाउनुभयो । बलिङमा कर्णालीका तलतले तीन विकेट लिँदा मार्क वाट र पवन सर्राफले दुई–दुई तथा सोमपाल कामीले एक विकेट लिनुभयो । त्यसअघि टस जितेर पहिले ब्याटिङ गरेको कर्णालीले निर्धारित २० ओभरमा आठ विकेट गुमाएर १५३ रन बनाएको थियो । कर्णालीका लागि तलतले ३३ बलमा दुई चौका र एक छक्कासहित अविजित ५१ रन बनाउनुभयो । ओपनर अरिफुल इस्लामले आक्रामक ब्याटिङ गर्दै १५ बलमा चार चौका र दुई छक्काको मद्दतमा ३५ रन जोडनुभएको थियो । त्यस्तै, गुल्सन झाले अन्तिम ओभरतिर आक्रामक ब्याटिङ गर्दै ६ बलमा एक चौका र दुई छक्कासहित १८ रन बनाउनुभयो । पवन सर्राफले २१ बलमा दुई छक्काको मद्दतमा १५ रन जोडनुभयो । यस सिजन पहिलो खेल खेल्दै ओपनिङमा आउनुभएका चसिन शर्मा खाता नखोली आउट हुनुभयो । दीपक डुम्रेले सात, कप्तान डेभिड मिलरले पाँच, सोमपाल कामीले चार र मार्क वाटले ६ रन बनाउनुभयो । नन्दन यादव दुई रनमा अविजित रहनुभयो । चितवनका लागि कमल सिंह ऐरी, सलाउद्दिन खान र उसामा मिरले समान दुई विकेट लिनुभयो । रिजन ढकाल र कप्तान सिकन्दर राजाले एक-एक विकेट हात पार्नुभयो । यस जितसँगै कर्णालीले लिग चरणका सात खेलमध्ये तीनमा जित र चारमा हार बेहोर्दै प्रतियोगिता टुंग्याएको छ । सुरुवाती दुई खेल जितेको कर्णाली त्यसपछि लगातार चार खेलमा पराजित भएको थियो । यता, चितवनले भने यस खेलअघि नै प्लेअफमा स्थान सुरक्षित गरिसकेको थियो । सात खेलबाट सात अंक जोडेको चितवन लिग चरणमा चौथो स्थानमा रहँदै एलिमिनेटरमा प्रवेश गरेको छ ।