काठमाडौं । भाइटीकाका दिन वर्षा र हिमपात गराएको मौसम प्रणाली कमजोर बन्दै जाने भएकाले बिहीबारदेखि देशभरको मौसममा क्रमशः सुधार हुने भएको छ। जल तथा मौसम विज्ञान विभागका अनुसार अबको तीन दिन मौसम सफा रहने पूर्वानुमान गरिएको छ। बुधबार बिहानसम्म घाम लागिरहेको काठमाडौं उपत्यकासहित देशका विभिन्न स्थानमा मध्याह्नपछि वर्षा र असिना परेको थियो। काठमाडौंमा मात्रै ३१.२ मिलिमिटरसम्म वर्षा मापन भएको विभागले जनाएको छ। वर्षाका कारण भाइटीका लगाउन जाने र लगाएर फर्किनेहरू बाटोमै केही समय रोकिन बाध्य भएका थिए। मौसमविद्हरूका अनुसार माथिल्लो वायुमण्डलमा रहेको चिसो पश्चिमी वायु र स्थानीय प्रणालीबीचको अन्तरक्रियाका कारण वर्षा, असिना र हिमपात भएको हो। मनसुनपछि जमिन तातिँदा स्थानीय वायुमा जलवाष्प थपिने र पश्चिमी वायुसँग मिसिँदा वर्षा गराउने अवस्था बनेको उनीहरूको भनाइ छ। तर यसपटक वर्षा गराउने अन्य बलिया मौसमी प्रणाली सक्रिय नरहेकाले यसको प्रभाव लामो समयसम्म नटिक्ने मौसमविद्हरूले बताएका छन्। बुधबार रातिदेखि नै वर्षा गराउने प्रणाली कमजोर हुँदै जाने र बिहीबारबाट मौसममा सुधार आउने विभागको पूर्वानुमान छ। मौसम क्रमशः सफा हुँदै जाने भएकाले बाली भित्र्याउने कामका लागि पनि बिहीबारदेखि अनुकूल अवस्था बन्ने विभागले जनाएको छ।
असिना र वर्षापछि मौसम खुल्दै, बिहीबारबाट सुधार हुने
Read Complete Original Article
Published originally on केन्द्रबिन्दु
