असलंकाको विस्फोटक अर्धशतकमा विराटनगरले लुम्बिनीलाई दियो १६७ रनको लक्ष्य

काठमाडौं । नेपाल प्रिमियर लिग (एनपीएल) को प्लेअफ दौडमा आफूलाई जीवितै राख्न संघर्ष गरिरहेको विराटनगर किंग्सले साविक विजेता लुम्बिनी लायन्ससामु १६७ रनको चुनौतीपूर्ण लक्ष्य प्रस्तुत गरेको छ। विराटनगरका लागि श्रीलंकाली ब्याटर चरिथ असलंकाले विस्फोटक अर्धशतक प्रहार गरेपछि टोलीले निर्धारित २० ओभरमा ४ विकेट गुमाएर १६६ रन बनाएको हो। कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार टस हारेर पहिले ब्याटिङ गरेको विराटनगरले सुरुवातदेखि नै प्रतिस्पर्धात्मक योगफल बनाउने प्रयास गरेको थियो। उसका लागि असलंकाले ४३ बलमा ६ छक्का र १ चौकासहित सर्वाधिक ६४ रन बनाए। उनले आक्रामक ब्याटिङ गर्दै विराटनगरको इनिङ्सलाई सम्हाल्नुका साथै टोलीलाई सम्मानजनक स्कोरसम्म पुर्‍याए। इमरान शेखले २४ रनको योगदान दिए। उनी ७० रनको अवस्थामा टोली हुँदा रिटायर्ड हर्ट भएर मैदान छाड्न बाध्य भए। त्यसपछि क्रिजमा आएका शुभम रन्जानेले असलंकासँग मिलेर इनिङ्स सम्हाले। यी दुईबीच भएको ७५ रनको साझेदारीले विराटनगरलाई बलियो अवस्थामा पुर्‍यायो। रन्जानेले २४ बलमा ४ चौकासहित अविजित ३१ रन बनाए। ओपनर लोकेश बमले १५ रन जोड्दा शेहान जयसूर्या १ र इसुरु उडाना ६ रनमा आउट भए। बसिर अहमद ६ रनमा अविजित रहे। बलिङतर्फ लुम्बिनीका किशोर महतोले सर्वाधिक २ विकेट लिए। अभिशेष गौतम र रुबेन ट्रम्पलम्यानले समान १ विकेट हात पारे। किशोरले ४ ओभरमा २४ रन खर्चिए भने अभिशेषले ३ ओभरमा १५ रन मात्र दिए। ट्रम्पलम्यान भने महँगा साबित भए। उनले ४ ओभरमा ५२ रन खर्चिए। यो खेल विराटनगरका लागि सामान्य प्रतिस्पर्धा मात्र होइन, प्लेअफ यात्राको निर्णायक परीक्षा हो। लिग चरणको अन्तिम खेल खेलिरहेको विराटनगरलाई प्लेअफ सम्भावना जीवित राख्न जित्नैपर्ने दबाब छ। यसअघि चितवन राइनोजले जनकपुर बोल्ट्सलाई पराजित गरेपछि विराटनगरमाथि दबाब थपिएको हो। विराटनगरले यो खेल जिते ८ अंकसहित चितवनलाई उछिन्दै प्लेअफको सम्भावना बलियो बनाउन सक्छ। तर पराजित भए टोलीको प्लेअफ यात्रा समाप्त हुनेछ। यता लुम्बिनी भने यसअघि नै प्लेअफमा पुगिसकेको छ। हाल दोस्रो स्थानमा रहेको लुम्बिनीले विराटनगरलाई हराउन सके ११ अंकसहित अंकतालिकाको शीर्ष स्थानमा उक्लिने अवसर पाउनेछ। त्यसले टोलीलाई पहिलो क्वालिफायरमा स्थान सुरक्षित गर्ने बाटो खोल्नेछ। अब विराटनगरको प्लेअफ भाग्य निर्धारण गर्न लुम्बिनीले १६७ रनको लक्ष्य कसरी पछ्याउँछ भन्ने हेर्न बाँकी छ।