अमूर्त सम्पदाको संरक्षण व्यवहारमै पुस्तान्तरण गर्नुपर्छ : कार्यवाहक प्रमुख डंगोल

काठमाडौं। काठमाडौं महानगरपालिकाकी कार्यवाहक प्रमुख सुनिता डंगोलले सम्यक महादानले नेवाः बौद्ध धर्म, संस्कृति तथा अमूर्त सम्पदाको पुस्तान्तरणमा महत्वपूर्ण भूमिका खेल्ने बताएकी छन्। राष्ट्रपति रामचन्द्र पौडेललाई सम्यक महादानमा सहभागी हुन निमन्त्रणा दिन शुक्रबार शीतल निवासमा आयोजित कार्यक्रममा बोल्दै डंगोलले परम्परागत संस्कृति, रीतिरिवाज तथा अमूर्त सम्पदाको संरक्षण लिखित अभिलेखमा मात्र सीमित नराखी व्यवहारमै निरन्तरता दिनुपर्ने बताइन्। उनका अनुसार सम्यक महादान आयोजना गर्नुको मुख्य उद्देश्य परम्परागत संस्कृति, रीतिरिवाज तथा अमूर्त सम्पदालाई एक पुस्ताबाट अर्को पुस्तामा हस्तान्तरण गर्नु हो। सम्यक महादानका क्रममा परम्परागत विधि तथा रीतिरिवाजको अभ्यास गर्दा नयाँ पुस्ताले आफ्नो संस्कृति र सम्पदाबारे प्रत्यक्ष रूपमा सिक्ने अवसर प्राप्त गर्ने उनले बताइन्। डंगोलले नेपालको मौलिक बौद्ध धर्म तथा नेवाः बौद्ध परम्पराको पहिचानका रूपमा रहेको सम्यक महादान र सम्यक भोजनको परम्परा लोप हुन नदिन सबैको साथ र सहयोग आवश्यक रहेको बताइन्। “काठमाडौं महानगरपालिकाले सम्यक महादान गर्नुको एउटै मात्र उद्देश्य हाम्रा सम्यक महादानको पुस्तान्तरण हुनुपर्छ भन्ने हो। अमूर्त सम्पदाको पुस्तान्तरण तब हुन्छ, जब हामी ती सम्पदा, परम्परा र रीतिरिवाजलाई निरन्तर रूपमा एउटा पुस्ताबाट अर्को पुस्तामा हस्तान्तरण गर्छौं,” उनले भनिन्। अमूर्त सम्पदा लिखित रूपमा अभिलेख राखेर मात्र संरक्षण नहुने भन्दै उनले व्यवहारमै परम्परागत विधि र रीतिरिवाजको अभ्यास गर्नुपर्नेमा जोड दिइन्। “हामीले गर्नुपर्ने सम्पूर्ण रीतिरिवाज गरेर हाम्रा सम्पदाबारे धेरै सिक्न सक्छौँ। त्यसैलाई निरन्तरता दिने प्रयास भएको छ,” उनले भनिन्। डंगोलले नेपालको मौलिक बौद्ध परम्परा र नेवाः बौद्ध धर्मको पहिचानसँग जोडिएको सम्यक महादान तथा सम्यक भोजनको परम्परा लोप हुन नदिन सामूहिक प्रयास आवश्यक रहेको बताइन्। काठमाडौं महानगरपालिकाले आगामी माघ १ गते स्वयम्भूको भुइँखेलमा ऐतिहासिक एवं परम्परागत सम्यक महादान आयोजना गर्ने भएको छ। २२ वर्षदेखि हुन नसकेको सम्यक महादानलाई पुनर्जीवन दिने उद्देश्यले महानगरपालिकाले कार्यक्रम आयोजना गर्न लागेको हो। सम्यक महादान नेवाः बौद्ध परम्परासँग जोडिएको महत्वपूर्ण सांस्कृतिक तथा धार्मिक परम्पराका रूपमा रहेको छ। – न्युज एजेन्सी नेपाल