स्याङ्जा र दाङमा भएको दुर्घटना हुँदा ३ जनाको मृत्यु, ५ घाइते

काठमाडौं । स्याङ्जामा ट्याक्टर दुर्घटना हुँदा दुई जनाको मृत्यु भएको छ। वालिङ नगरपालिका ९ गाईश्वारामा ग. १ त ५७६९ नम्बरको ट्याक्टर दुर्घटना हुँदा अरु तीन जना घाइते भएका छन्। वालिङ– हुवास भित्री पक्की सडक खण्डमा हुवासबाट वालिङतर्फ आउँदै गरेको ट्याक्टर आफैँ अनियन्त्रित भएर पल्टिन जाँदा ट्याक्टरमा सवार वालिङ – १० बस्ने ६१ बर्षीय नन्दु भन्ने नन्दलाल बुढामगर र पर्वत घर भइ वालिङ – १० नै बस्ने ४३ बर्षीय प्रेम राना मगरको मृत्यु भएको हो। गम्भीर घाइते उनीहरुको प्राथमिक स्वास्थ्य केन्द्र वालिङमा उपचारको क्रममा मृत्यु भएको प्रहरी नायब उपरीक्षक रमेश दत्त अवस्थीले जानकारी दिए। दुर्घटनामा ट्याक्टर चालक दाङको शान्तिनगर –१ का ३७ बर्षीय धनविर पुन मगर, वालिङ –१० का २० बर्षीय सुलभ परियार र ४६ बर्षीय झक बहादुर थापा घाइते भएका छन्। उनीहरु प्राथमिक स्वास्थ्य केन्द्र वालिङमा उपचार भैरहेको प्रहरीले जनाएको छ। देउखुरीमा ट्रक र मोटरसाइकल ठोक्किँदा १ जनाको मृत्यु, २ जना घाइते दाङको देउखुरीमा ट्रक र मोटरसाइकल ठोक्किँदा १ जनाको मृत्यु भएको छ भने २ जना घाइते भएका छन् । लमही–भालुवाङ सडकखण्ड अन्तरगत राप्ती गाउँपालिका ३ बाघढड्डीमा गएराति दुर्घटना भएको हो । दुर्घटनामा मोटरसाइकल चालक राप्ती गाउँपालिका–६ भगवानपुरका ३१ वर्षीय प्रविन चौधरीको मृत्यु भएको छ । गम्भीर घाइते चौधरीलाई भालुवाङ अस्पतालमा उपचारका क्रममा चिकित्सकले मृत घोषणा गरेका हुन् । दुर्घटनामा मोटरसाइकलमा सवार राप्ती गाउँपालिका–३ मसुरियाका १६ वर्षीया निशु चौधरी र १९ वर्षीया करिना चौधरी गम्भीर घाइते भएका छन् । घाइते दुवैको अहिले बुटवलस्थित लुम्बिनी सिटीमा उपचार भइरहेको इलाका प्रहरी कार्यालय भालुवाङले जानकारी दिएको छ । पूर्वबाट पश्चिम जाँदै गरेको लु१ख ९२४८ नम्बरको ट्रक र पश्चिमबाट आइरहेको प्रदेश ३–०२–०१० प ६९२२ नम्बरको मोटरसाइकल एक आपसमा ठोक्किएर दुर्घटना भएको थियो । ट्रक, चालक र मोटरसाइकललाई प्रहरीले नियन्त्रणमा लिएर अनुसन्धान अगाडि बढाएको छ ।