भीमफेदी दुर्घटनामा ज्यान गुमाउने ११ जनाकै खुल्यो पहिचान, एकै परिवारका आमा र तीन छोरीको मृत्यु

काठमाडाैं । मकवानपुरको भीमफेदीमा भएको भीषण सवारी दुर्घटनामा परी ज्यान गुमाउने चालकसहित ११ जनाकै पहिचान खुलेको छ । जिल्ला प्रहरी कार्यालय मकवानपुरका अनुसार दुर्घटनामा पाँच महिला र छ जना पुरुषको मृत्यु भएको हाे । दुर्घटनामा सवारी चालक सर्लाहीको कबिलासी गाउँपालिका–८ का ३० वर्षीय रवि शंकर कुमार मण्डलको मृत्यु भएको छ । अन्य १० जना मृतक सर्लाहीकै चक्रघट्टा गाउँपालिका–४, सुन्दरपुर टोलका बासिन्दा हुन् । दुर्घटनामा एकै परिवारका आमा र तीन छोरी तथा अर्को परिवारका श्रीमान्–श्रीमतीले ज्यान गुमाएका छन् । मृत्यु हुनेमा ३५ वर्षीया पुनम यादव र उनका छोरीहरू १० वर्षीया अनु कुमारी यादव, ७ वर्षीया दिक्षा यादव र ५ वर्षीया दिपिका यादव रहेका छन् । त्यस्तै, २६ वर्षीय बिकेश यादवको पनि मृत्यु भएको छ । यसैगरी ३६ वर्षीय गुड्डु यादव, उनकी ३२ वर्षीया श्रीमती गायत्री देवी, २६ वर्षीय राम दुलार यादव, २५ वर्षीय सुबोध यादव र १५ वर्षीय रोहन यादवको पनि दुर्घटनामा ज्यान गएको प्रहरीले जनाएको छ । दुर्घटनामा घाइते भएकाहरुकाे विभिन्न अस्पतालमा उपचार भैरहेकाे छ । छठ पर्व मनाउन काठमाडौंमा व्यवसाय तथा रोजगारीमा संलग्न यात्रुहरू एउटै गाडी रिजर्भ गरेर घर फर्किने क्रममा बिहीबार बिहान दुर्घटना भएको थियो ।