भीमफेदी दुर्घटना : आफन्तद्वारा शव बुझ्न अस्वीकार, सरकारसँग क्षतिपूर्ति माग

हेटौँडा । मकवानपुरको भीमफेदीमा भएको यात्रुवाहक ईभी दुर्घटनामा मृत्यु भएका १४ जनाका आफन्तले क्षतिपूर्तिको माग राख्दै शव बुझ्न अस्वीकार गरेका छन्। पीडित परिवारले सङ्घीय सरकारले विशेष रूपमा सम्बोधन गर्नुपर्ने अडान राखेपछि मृतकका शव अस्पतालमै रोकिएका छन्। बिहीबार बिहान काठमाडौँबाट छठ पर्व मनाउन सर्लाही जाँदै गरेको मधेस प्रदेश ०३–००१ ज ०८८० नम्बरको यात्रुवाहक ईभी मकवानपुरको भीमफेदी गाउँपालिका–६ स्थित चिसापानीगढीमा दुर्घटनामा परेको थियो। सडकबाट करिब पाँच सय मिटर तल खसेको उक्त गाडीमा चालकसहित २० जना सवार थिए। दुर्घटनामा १४ जनाको मृत्यु भएको छ भने ६ जना घाइते भएका छन्। मृतकका आफन्तले यसअघि पीडित परिवारलाई जनही १० लाख रुपैयाँ क्षतिपूर्ति दिनुपर्ने, परिवारका सदस्यलाई रोजगारीको व्यवस्था गर्नुपर्ने तथा घाइतेको उपचार खर्च सरकारले व्यहोर्नुपर्ने माग राखेका थिए। पछिल्लो समय उनीहरूले सङ्घीय सरकारबाटै थप सम्बोधन हुनुपर्ने माग अघि सारेका छन्। मृतकका आफन्तले शव बुझ्न नमानेपछि १३ जनाको शव हेटौँडा अस्पतालको शव गृहमा राखिएको छ। एक जनाको परिवारले भने शव बुझिसकेको जिल्ला प्रहरी कार्यालय मकवानपुरका प्रहरी प्रवक्ता डीएसपी माधवप्रसाद काफ्लेले जानकारी दिए। पीडित परिवार, मकवानपुरका प्रमुख जिल्ला अधिकारी वसन्त अधिकारी, प्रहरी प्रमुख एसपी श्यामबहादुर खत्रीलगायतको उपस्थितिमा बिहीबार छलफल भए पनि कुनै निष्कर्ष निस्कन सकेन। पीडित परिवारका माग र क्षतिपूर्तिको विषयमा शुक्रबार पनि छलफल हुने डीएसपी काफ्लेले बताए। प्रमुख जिल्ला अधिकारी अधिकारीले कानुन तथा नियमअनुसार उपलब्ध गराउनुपर्ने क्षतिपूर्ति दिन कुनै बाधा नरहेको बताएका छन्। तर, पीडित परिवारले कानुनले तोकेकोभन्दा थप क्षतिपूर्ति सङ्घीय सरकारबाटै उपलब्ध गराउनुपर्ने अडान राखेपछि शव हस्तान्तरण र पोस्टमार्टमको प्रक्रिया अघि बढ्न नसकेको प्रहरीले जनाएको छ। दुर्घटनापछि नेपाल प्रहरी, सशस्त्र प्रहरी र नेपाली सेनाको टोलीले जोखिमपूर्ण भिरबाट उद्धार गरेको थियो। घाइते ६ जनाको हेटौँडा, भरतपुर र काठमाडौंका विभिन्न अस्पतालमा उपचार भइरहेको मकवानपुर प्रहरीले जनाएको छ।