भारतीय सेनामा गोर्खा भर्ती खुलाउन माग गर्दै माइतीघरमा प्रदर्शन

काठमाडौं । भारतीय सेनामा नेपाली गोर्खाको भर्ती प्रक्रिया पुनः सुरु गर्न माग गर्दै पूर्वगोर्खा सैनिकहरूले काठमाडौंमा प्रदर्शन गरेका छन् । अल नेपाल भारतीय पूर्व सैनिक कल्याणकारी संघको आयोजनामा सोमबार माइतीघरमा प्रदर्शन गरिएको हो । भारत सरकारले अग्निपथ योजना लागू गरेपछि भारतीय सेनामा नेपाली गोर्खाको भर्ती प्रक्रिया रोकिएको भन्दै पूर्वसैनिकहरूले भर्ती पुनः सुरु गर्न सरकारको ध्यानाकर्षण गराएका छन् । यसअघि १२ अगस्ट २०२६ मा पोखरामा पनि पूर्वगोर्खा सैनिक र युवाहरूले भर्ती प्रक्रिया खुलाउन माग गर्दै प्रदर्शन गरेका थिए । त्यस्तै, १९ अगस्ट २०२६ मा भारतीय स्थल सेनाध्यक्ष जनरल धीरज सेठ नेपाल भ्रमणमा आएका बेला पनि पूर्वगोर्खा सैनिकहरूले भर्ती खुलाउन पहल गर्न आग्रह गरेका थिए । तर, उक्त भ्रमणका क्रममा भर्ती प्रक्रिया पुनः सुरु गर्ने विषयमा कुनै ठोस सहमति हुन सकेन । सोमबारको प्रदर्शनमा सहभागीहरूले बेरोजगार नेपाली युवाका लागि भरपर्दो रोजगारीको व्यवस्था गर्नसमेत माग गरेका छन् । उनीहरूले सचिवस्तरीय निर्णय खारेज गरी पूर्वगोर्खा सैनिकका संस्था तथा संगठन दर्ता र नवीकरण गर्ने व्यवस्था मिलाउन पनि सरकारसँग आग्रह गरेका छन् ।