पत्रकार पक्राउबारे सरकारको स्पष्टीकरण- हामीले कुनै निर्देशन दिएका थिएनौँ

<p>सरकारले पत्रकारहरूमाथि भएको धरपकडमा आफ्नो कुनै संलग्नता नरहेको स्पष्ट पारेको छ ।</p> <p>मंगलबार सिंहदरबारमा बसेको मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता एवं शिक्षा तथा खेलकुदमन्त्री सस्मित पोखरेलले पत्रकारमाथिको धरपकडबारे प्रहरीले सरकारसँग अनुमति नलिएको र सरकारले कुनै निर्देशनसमेत नदिएको बताए ।</p> <p>उनका अनुसार प्रहरीका केही आन्तरिक सूचना चुहावट भएको र त्यसबारे बुझ्न प्रहरीले सोधपुछ गरेको सरकारको बुझाइ छ । प्रधानमन्त्रीले आईजीपीको राजीनामा मागेको वा सरकारले कारबाही गर्न लागेको भन्ने भ्रामक सूचना कहाँबाट आयो भन्ने विषयमा प्रहरीले तथ्य बुझ्न खोजेको उनले बताए ।</p> <p>‘पत्रकारहरू पक्राउको विषयमा सरकारको बुझाइ के छ भने प्रहरीका कतिपय आन्तरिक सूचनाहरू चुहावट भएको, उदाहरणका लागि प्रधानमन्त्रीले आईजीपीको राजीनामा माग्यो वा सरकारले कारबाही गर्न लागेको भनी हुँदै नभएका भ्रामक सूचनाहरू कहाँबाट आए ? तथ्यसमेत जाँच नगरी कसरी भयो भनेर प्रहरीले बुझ्नका लागि, सल्लाह गर्नका लागि भएको प्रहरीको आन्तरिक कुरा मात्र हो,’ उनले भने ।</p> <p>उनले उक्त कार्य सरकारको पूर्ण अनुमतिमा नभएको र यसबारे सरकार तथा प्रधानमन्त्रीलाई जानकारीसमेत नभएको स्पष्ट पारे । केही संवेदनशील सूचना चुहावट भएको कारण प्रहरीले आफ्नो आन्तरिक कामअन्तर्गत सोधपुछ गरेको उनको भनाइ थियो ।</p> <p>पत्रकारहरू पक्राउ परेको खबर प्राप्त हुनासाथ प्रधानमन्त्री बालेन्द्र साहले उनीहरूलाई नियन्त्रणमा नराख्न र नियन्त्रणमा रहेकालाई तुरुन्त रिहा गर्न निर्देशन दिएको पनि पोखरेलले बताए ।</p> <p>‘जानकारी आउनेबित्तिकै प्रधानमन्त्रीज्यूले कोही पनि पत्रकारलाई नियन्त्रणमा नलिनु र नियन्त्रणमा हुनुहुन्छ भने तुरुन्त रिहा गर्नु भनेर निर्देशन दिनुभएको थियो,’ उनले भने ।</p> <p>उनले घटनाबारे थप कारबाही प्रक्रिया आवश्यकताअनुसार गृह मन्त्रालयमार्फत अघि बढाइने पनि बताए ।</p>