डोल्पा कारागारबाट फरार थप दुई कैदी पक्राउ, अझै दुई थुनुवा फरार

डोल्पाको दुनैस्थित कारागार कार्यालयबाट फरार भएका थप दुई कैदी पक्राउ परेका छन्। उनीहरू पक्राउ परेसँगै कारागारबाट फरार भएका आठ जनामध्ये ६ जना प्रहरीको नियन्त्रणमा आएका छन् भने दुई थुनुवा अझै फरार छन्। प्रहरीका अनुसार पछिल्लो पटक पक्राउ पर्नेमा जाजरकोटको बारेकोट गाउँपालिका-१ घर भएका २५ वर्षीय यज्ञ विक र डोल्पाको त्रिपुरासुन्दरी नगरपालिका-४ घर भएका २८ वर्षीय धनबहादुर भनिने हरिबहादुर बुढा रहेका छन्। प्रहरीले खोजतलासका क्रममा उनीहरूलाई डोल्पाको त्रिपुरासुन्दरी नगरपालिका-४ स्थित रंग गाउँनजिकैको जंगलमा हिँडिरहेको अवस्थामा फेला पारी नियन्त्रणमा लिएको हो। पक्राउ परेका विकलाई १२ वर्ष कैद सजाय तोकिएकोमा १० वर्ष आठ महिना कैद भुक्तान गर्न बाँकी रहेको प्रहरीले जनाएको छ। त्यस्तै, बुढालाई पनि १२ वर्ष कैद सजाय तोकिएकोमा नौ वर्ष पाँच महिना कैद भुक्तान गर्न बाँकी छ। कारागारबाट फरार भएपछि उनीहरूको खोजीमा रहेको प्रहरीले दुवै जनालाई नियन्त्रणमा लिएर कानुनबमोजिम थप कारबाही प्रक्रिया अघि बढाएको जनाएको छ। प्रहरीका अनुसार दुनै कारागारबाट फरार भएका कैदी तथा थुनुवामध्ये हालसम्म ६ जना पक्राउ परिसकेका छन्। बाँकी दुई थुनुवाको खोजी जारी राखिएको छ। कारागारबाट उनीहरू फरार भएको समय, परिस्थिति तथा घटनामा अन्य व्यक्तिको संलग्नताबारे भने पछिल्लो विवरणमा खुलाइएको छैन। घटनाका सम्बन्धमा थप अनुसन्धान भइरहेको नेपाल प्रहरीले जनाएको छ।