काठमाडौं । भारतको दुईदिने राजकीय भ्रमणमा रहेका प्रधानमन्त्री बालेन शाह र भारतीय विदेशमन्त्री डा. एस जयशंकरबीच नयाँ दिल्लीमा २५ मिनेट शिष्टाचार भेटवार्ता भएको छ। नयाँ दिल्लीस्थित होटल ताजमहलमा भएको भेटमा नेपाल–भारत सम्बन्धलाई थप सुदृढ बनाउने विषयमा छलफल भएको प्रधानमन्त्री शाहको सचिवालयले जनाएको छ। भेटवार्ताका क्रममा दुई देशबीचको कनेक्टिभिटी, व्यापार, पारवहन तथा वाणिज्य, ऊर्जा, संस्कृति, शिक्षा र जनस्तरको सम्बन्धलगायतका विषयमा सहकार्य विस्तार गर्नेबारे कुराकानी भएको थियो। दुवै नेताले द्विपक्षीय सम्बन्धका विविध पक्षबारे विचार आदानप्रदान गर्दै आपसी सहकार्यलाई थप प्रभावकारी बनाउने विषयमा छलफल गरेका थिए। प्रधानमन्त्री शाहसँग भेटवार्ता गर्न भारतीय विदेशमन्त्री जयशंकर होटल ताजमहल पुगेका थिए। भेटवार्ता सम्पन्न भएपछि आजका लागि प्रधानमन्त्री शाहको अन्य औपचारिक कार्यक्रम तय भएको छैन। प्रधानमन्त्री शाहको ३४ सदस्यीय औपचारिक भ्रमण टोलीमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका मुख्य तथा राजनीतिक सल्लाहकारसहित उच्चपदस्थ सरकारी अधिकारी, व्यवसायी र पत्रकार सहभागी छन्। यसबाहेक निजी क्षेत्रका ५३ सदस्यीय उद्योगी–व्यवसायीको टोली पनि आफ्नै खर्चमा भ्रमणमा सहभागी भएको छ। भ्रमणको दोस्रो दिन सोमबार प्रधानमन्त्री शाहले भारतीय प्रधानमन्त्री नरेन्द्र मोदीसँग प्रतिनिधिमण्डलस्तरीय द्विपक्षीय वार्ता गर्ने कार्यक्रम छ। त्यसपछि उनले भारतीय राष्ट्रपति द्रौपदी मुर्मूसँग शिष्टाचार भेट गर्नेछन्। साथै, राजघाटस्थित महात्मा गान्धीको समाधिस्थलमा पुगेर श्रद्धासुमन अर्पण गर्ने कार्यक्रमसमेत रहेको छ।
जयशंकरसँग बालेनको २५ मिनेट वार्ता, के भयो छलफल ?

Read Complete Original Article
Published originally on केन्द्रबिन्दु






