ओडिआई क्रिकेटमा अफगानिस्तानलाई इतिहासकै सर्वोत्कृष्ट वरीयता

काबुल । अफगानिस्तान क्रिकेट टोलीले अन्तर्राष्ट्रिय एकदिवसीय क्रिकेटमा आफ्नो इतिहासकै सबैभन्दा ठूलो उपलब्धि हासिल गरेको छ । अन्तर्राष्ट्रिय क्रिकेट परिषद् (आइसिसी) को पछिल्लो ओडिआई टोली वरीयतामा अफगानिस्तान छैटौँ स्थानमा उक्लिएको हो । पूर्वविश्वविजेता श्रीलंकालाई पछि पार्दै अफगानिस्तानले पहिलोपटक शीर्ष-६ टोलीको सूचीमा स्थान बनाएको हो । अब भारत, न्युजिल्याण्ड, दक्षिण अफ्रिका, पाकिस्तान र अष्ट्रेलियामात्र वरीयतामा अफगानिस्तानभन्दा अगाडि रहेका छन् । सन् २००९ मा एकदिवसीय क्रिकेटमा डेब्यु गरेको अफगानिस्तानले १७ वर्षको यात्रापछि विश्वका ६ बलिया टोलीभित्र आफूलाई स्थापित गर्न सफल भएको हो । यसअघि नै अफगानिस्तानले बंगलादेश, इंग्ल्याण्ड र वेष्ट इण्डिजजस्ता टोलीहरूलाई पछाडि पारिसकेको थियो । अफगानिस्तानको वरीयतामा सुधारको सुरुवात गत अगस्ट २०२६ मा भएको आयरल्याण्ड भ्रमणबाट भएको थियो । पाँच म्याचको ओडिआई शृंखलामा अफगानिस्तानले आयरल्याण्डलाई उसैको घरेलु मैदानमा ४–० ले पराजित गरेको थियो । आयरल्याण्ड भ्रमणपछि युएईमा बंगलादेश र जिम्बाब्वे सम्मिलित ओडिआई त्रिकोणात्मक शृंखला खेल्न पुगेको अफगानिस्तानले एकै म्याच पनि नगुमाई उपाधि आफ्नो नाममा गरेको थियो । बंगलादेशविरुद्धको एक म्याचमा अफगानिस्तानले विपक्षीलाई मात्र १६० रनमा समेट्दै ३५.३ ओभरमा ३ विकेट गुमाएर लक्ष्य भेट्टाएको थियो । त्रिकोणात्मक शृंखला जित्नुमा स्टार लेग स्पिनर राशिद खानको बलिङ मुख्य योगदान रह्यो । उहाँले तीन म्याचमा ११ विकेट लिँदै ‘प्लेयर अफ द सिरिज’ को उपाधि जित्नुभयो । अफगानिस्तानले हालसम्म कुल १९१ ओडिआई खेल खेलेको छ, जसमध्ये ९६ खेलमा जित हासिल गरेको छ । मुख्यतया स्पिन बलिङका लागि चिनिने अफगानिस्तानको ब्याटिङमा पनि इब्राहिम जादरान, रहमानुल्लाह गुरबाज र सदीकुल्लाह अटलजस्ता युवा ब्याट्सम्यानहरूले लगातार उत्कृष्ट योगदान दिइरहेका छन् । अर्कोतर्फ, टी-२० अन्तर्राष्ट्रिय टोली वरीयतामा भने इंग्ल्याण्ड शीर्ष स्थानमा छ भने भारत दोस्रो र अष्ट्रेलिया तेस्रो स्थानमा रहेका छन् । पुरुष एकदिवसीय टोलीको नयाँ वरीयतामा नेपालले एक स्थान सुधार गर्दै १६औँ स्थान ओगटेको छ । पछिल्लो वरीयताअनुसार नेपालले ३३ खेलबाट ९३९ अंक प्राप्त गर्दै २८ रेटिङ बनाएको छ । नेपालभन्दा ठीक अगाडि १५औँ स्थानमा संयुक्त राज्य अमेरिका रहेको छ भने नेपालभन्दा पछाडि १७औँ स्थानमा नामिबिया रहेको छ । आइसिसीको नयाँ वरीयतामा भारत शीर्ष स्थानमा कायम रहँदा न्युजिल्याण्ड दोस्रो र दक्षिण अफ्रिका तेस्रो स्थानमा छन् । एजेन्सी