मियामी । संयुक्त राज्य अमेरिकाको मियामी विमानस्थलमा दुई विमान आपसमा ठोकिएका छन्। शनिबार राति पानामा सिटीबाट आएको कोपा एयरलाइन्सको यात्रुवाहक विमान विमानस्थलतर्फ अघि बढ्दै गर्दा यसको पखेटा यूपीएस कार्गो विमानको अगाडिको भागमा ठोकिएको हो। मियामी-डेड फायर रेस्क्युका अनुसार यूपीएस बोइङ ७६७ र कोपा एयरलाइन्सको बोइङ ७३७ आपसमा ठक्कर खाएका हुन्। दुर्घटनामा यात्रुवाहक विमानमा सवार दुई जना सामान्य घाइते भएका छन्। विमानमा १६६ यात्रु र चालक दलका ६ सदस्यसहित १७२ जना सवार थिए। सबैलाई सुरक्षित रूपमा बाहिर निकालिएको छ। दुर्घटना अमेरिकी समयअनुसार शनिबार राति ९:१५ बजेतिर भएको थियो। त्यतिबेला दुवै विमान विमानस्थल ट्याक्सीवेमा थिए। यूपीएस कार्गो विमान कोलम्बियाको बोगोटाको लागि उड्ने तयारीमा थियो। कोपा एयरलाइन्सका यात्रु सेजर फरेराले सीएनएनलाई बताएअनुसार विमान सामान्य गतिमा विमानस्थलतर्फ अघि बढिरहेको थियो, अचानक यात्रु चिच्याए र अर्को विमानसँग ठोकिएको झट्का महसुस भयो । उनले भने, ‘ठोकिँदा विमान अचानक एक छेउमा हल्लियो र मोडियो। केही यात्रु आत्तिए, तर चालक दलका सदस्यले तुरुन्तै सबैलाई बस्न भने।’
अमेरिकाको मियामी विमानस्थलमा दुई विमान ठोकिए

Read Complete Original Article
Published originally on केन्द्रबिन्दु






