सुनिल थापाको अन्तिम चलचित्र ‘हिमालयन गोल्ड’मा कर्माको फरक अवतार

काठमाडौं । अभिनेता कर्मा कमै फिल्ममा मात्र नकारात्मक भूमिकामा देखिएका छन् । तर जतिमा देखिएका छन्, ती भूमिका दर्शकले उत्तिकै मनपराइरहेका छन् । यिनै कर्मा आगामी मंसिर ४ गतेबाट रिलिज हुने फिल्म ‘हिमालयन गोल्ड’मा ‘प्रकाश’ नामक खलपात्रको भूमिकामा देखिँदैछन् । जुन भूमिका उनकै भनाईमा परिस्थिति अनुसार पात्रले निभाउँछ । कर्मा आफ्नो चरित्रलाई पहिलाको भाषामा ‘गुण्डा’को ट्याग दिन्छन् । ‘मेरो चरित्र नै नेगेटिभ सेडको छ । पहिलाको चलचल्तीको भाषामा भन्नुपर्दा गुण्डाको छ । तर म त्यसलाई त्यसरी लिँदिन, किनकी यो एउटा पात्र हो । संयोगबस त्यो पात्रले उसको परिस्थिति अनुसार कामहरु गर्यो,’कर्मा भन्छन्, ‘मेरो क्यारेक्टरले पनि परिस्थिति अनुसार यार्सागुम्बा लुट्नेदेखि लिएर यताउता गर्ने काम गर्छ । यो भन्दा अगाडि लुटमा पनि बैंक लुट्ने क्यारेक्टर थियो । मान्छेहरु एउटा पात्रले किन त्यस्तो काम गर्छ भनेर प्रश्न गर्छन् । तर त्यो काम भनेको परिस्थिति अनुसार हुँदै जाने हो नि ।’कर्मा फिल्म ‘हिमालयन गोल्ड’ को अनुभव रमाइलो रहेको सुनाउँछन् । ‘निर्देशक धिराज राजवंशीको यो पहिलो फिल्म हो । यसको स्क्रिप्ट, मसँगै अन्य पात्रहरु, सबै कुराहरु नै पृथक छ । मैले गर्न खोजिरहेको फिल्महरुमध्ये ‘हिमालयन गोल्ड’ पनि एक हो । किनकी यसको कथावस्तु, प्रेजेन्टेसन पनि पृथक छ’, उनी भन्छन् । कर्माले यसअघि धिराजको बुवासँग फिल्म ‘शेरबहादुर’मा सहकार्य गरेका रहेछन् । उनको बुवासँग काम गरेको अनुभवले पनि कर्मालाई धिराजसँग सहकार्य गर्न सजिलो भएको रहेछ । निर्देशक धिराजले आफूलाई कथा सुनाउँदा त्यसलाई कसरी प्रस्तुत गर्ने भन्ने कुरा पनि बताएकोले फिल्ममा काम गर्न सजिलो भएको बताए । कर्मा ‘हिमालयन गोल्ड’ भन्दा अघि पनि मुस्ताङ, डोल्पा पुगेका रहेछन् । ‘त्यतिबेला म प्रत्यक्ष रुपमा यार्सागुम्बा टिप्ने ठाउँसम्म नै पुगेको त थिइनँ । तर पुग्ने मानिसहरुसँग मैले घुलमिल गरेको थिएँ । ९० को दशक पछि नै यार्सागुम्बा विश्वबजारमा फैलन थालेको । यो सिजनमा टिप्ने बेलामा म डोल्पामै हुँदा खेरी पनि स्कुल बन्द गरेर बच्चाबच्चा लिएर ठूलो समूह यार्सागुम्बा टिप्न गएको देखेको छु । बच्चाहरुलाई लिएर जाने कारण चाहिँ बच्चाको आँखा तेजिलो हुन्छ भन्ने रहेछ । जसकारण स–साना यार्सागुम्बाहरु पनि टिप्न सजिलो हुँदो रहेछ’, उनले भने, ‘मैले स्थानीयसँग कुरा गर्दा पहिला पहिला लुटपाट र झगडा पनि हुन्थ्यो रे । अहिले अलिक व्यवस्थित छ । नेपाली सेनाहरु यार्सागुम्बा टिप्नुभन्दा अगाडि नै लेकमा पुगिसकेका हुन्छन् । मान्छेको समूह अनुसार यार्सागुम्बा टिप्ने डाँडा छुट्याइएको हुन्छ । पोखरा, काठमाडौं, सुर्खेतबाट आएका मान्छेहरुले यार्सागुम्बा टिप्नका लागि टिकट लिन्छन् । यहाँबाट आएका कति मान्छेहरु लेक लागेर बिरामी भएको पनि देखेको छु ।’ कर्माले यार्सागुम्बाकै विषयमा एरिक भ्यालीले निर्माण गरेको डकुमेन्ट्री र अन्य निर्देशकको डकुमेन्ट्री हेरेकाले पनि यार्सागुम्बाका विषयमा धेरथोर जानकारी भएको बताए । ‘अहिले त यार्सागुम्बा भनेर एउटा पेयपदार्थ नै बनाइएको छ । विश्वमाझ नै यार्सागुम्बालाई शक्ति प्रदान गर्ने औषधिका रुपमा चित्रण गरिएको छ,’ कर्मा भन्छन् । कर्माको अनुभवमा मुस्ताङको लोकेसन नै यो फिल्मको सुटिङका लागि चुनौति थियो । ‘ट्रेलरमा देखाइएको जुन गुफामा हामीले सुट गरेका छौं । त्यो चाहिँ हाइ अल्टिच्युडमा थियो । त्यति उच्च स्थानमा रहेको गुफामा सुटिङ गर्नु आफैंमा चुनौति थियो । त्यहाँ धुलो उड्नेदेखि अक्सिजन नपुग्नेसम्मका चुनौति थिए । त्यस्ता चुनौतिका बाबजुद पनि सुटिङ गर्यौं । हामीले त्यो गुफामा झण्डै पाँच दिन लगाएर एक्सन दृश्य सुट गर्यौं’, उनले सम्झिए । फिल्ममा परीक्षा लिम्बुले निभाएको फिमेल लिड प्रोटागोनिस्ट चरित्र, सुनिल थापाको अभिनयसँगै कथाको दृष्टिकोणले पनि हिमालयन गोल्ड हेर्नुपर्ने कर्माको तर्क छ । ‘अझ रोचक कुरा त के भने यो फिल्ममा गीत नै छैन । गीत बिनाको कथात्मक फिल्म हेर्न चाहनेका लागि हिमालयन गोल्ड उपर्युक्त फिल्म बनेको छ’, उनी भन्छन् । ह्वाइट एलिफेन्ट मोसन पिक्चर प्रोडक्सनको ब्यानरमा निर्माण भएको फिल्ममा कर्मा शाक्यसँगै परीक्षा लिम्बु, सुनिल थापा, मेनुका प्रधान, राहुल एन. मुखिया, अङ्कित खड्का, सुनिल तामाङ, तेन्जिङ ठकुरी, सविता अधिकारी र ऋषिकेश बस्यालको पनि अभिनय रहेको छ । यो फिल्मको सबैभन्दा भावनात्मक पक्ष यो नेपाली सिनेमाका वरिष्ठ अभिनेता सुनिल थापाको अन्तिम चलचित्र हुनु हो । निर्देशक राजवंशीका अनुसार थापाको अन्तिम अभिनयलाई नेपाल र भारतका दर्शकसम्म पुर्‍याउनु उनको योगदानप्रति उचित श्रद्धाञ्जली हुने भनाइ छ । हिमाली क्षेत्रको पृष्ठभूमिमा निर्माण गरिएको यो सर्भाइभल थ्रिलर फिल्मले अस्तित्वको संघर्ष, लोभ र विश्वासघातलाई मुख्य कथावस्तु बनाइएको छ । यो फिल्मका निर्माता मीनबहादुर भाम, लाइन प्रोड्युसर शैलेन्द डी. कार्की, सह-निर्माता सुयश ज्ञवाली र कायकारी निर्माता राजु राजवंशी रहेका छन् । निर्देशक राजवंशीकै कथा रहेको फिल्ममा दीपेन्द गौचन र धिराज राजवंशीको पटकथा, विशष्ठ प्रधानको डिओपी, निमेश श्रेष्ठको सम्पादन, सजल लोप्चन र करुण थापाको भिएफएक्स छ । यो फिल्मलाई भारतको प्रतिष्ठित वितरक ए ए फिल्म्स्ले भारतमा प्रदर्शन गर्ने भएको छ । ए ए फिल्म्स भारतीय सिनेमाकै प्रख्यात वितरण कम्पनी हो, जसले बहुबली, आरआरआर, केजिएफ जस्ता फिल्म वितरण गरेको थियो । मिडलइस्ट डिस्ट्रिब्युटरमा फार्स फिल्मको मोसन पिक्चर्सले गर्ने फिल्मलाई नेपालमा एप्पल इन्टरटेनमेन्टले वितरणको जिम्म लिएको छ । जापानमा ‘टोकियो ड्रिम इन्टरटेनमेन्ट’ वितरक छन् । निर्माण टिमका अनुसार नेपाली फिल्मले यति ठूलो वितरकमार्फत भारतव्यापी प्रदर्शन पाउनु यो पहिलो पटक हो । थडानीले फिल्मको कथावस्तुले भाषा र भौगोलिक सीमा पार गरेर दर्शकसँग जोडिन सक्ने विश्वास व्यक्त गरेका छन् ।