सिटी र युनाइटेडको संकट गहिरिँदा बार्सिलोनाको सानदार पुनरागमन

लण्डन । इंग्लिस प्रिमियर लिगमा म्यानचेस्टर सिटी र म्यानचेस्टर युनाइटेडले निराशाजनक नतिजा बेहोरेका छन् । सिटी ब्राइटन एण्ड होभ एल्बियनसँग १-० ले पराजित हुँदा युनाइटेड चेल्सीसँग २-० ले स्तब्ध बनेको हो । उता, स्पेनिस ला लिगामा लगातार दुई हारपछि बार्सिलोनाले आलाभेसमाथि ६-१ को सानदार जित निकाल्दै पुनरागमन गरेको छ । जर्मन बुन्डेस लिगाको चर्चित भिडन्त ‘डेर क्लासिकर’मा भने बायर्न म्युनिख र बोरुसिया डर्टमन्ड २-२ को बराबरीमा रोकिए । हारसँगै प्रिमियर लिगमा सिटीको लगातार दोस्रो पराजय भएको छ । ब्राइटनको घरेलु मैदानमा भएको खेलमा यासिन अयारीले गरेको एकमात्र गोल नै सिटीको हारको कारण बन्यो । उहाँले माटियस नुनेसको गल्तीको फाइदा उठाउँदै खेलको ११औँ मिनेटमा गोल गर्नुभएको थियो । यसअघि साता बिचमा भएको इङ्लिस फुटबल लिग (इएफएल) कपमा सिटीले ब्राइटनलाई पेनाल्टी सुटआउटमा पराजित गरेको थियो । तर, लिगमा भने ब्राइटनले घरेलु मैदानमा सिटीलाई निराश बनायो । सिटीले खेलमा बराबरी गोल फर्काउने केही अवसर सिर्जना गरे पनि सफल हुन सकेन । इलिमान एनडियाएले मध्यान्तरअघि र पछाडि गोलका अवसर पाउनुभएको थियो । तर, ब्राइटनका गोलरक्षक बार्ट भेर्ब्रुगेनले उत्कृष्ट बचाउ गर्दै सिटीलाई रोकिदिनुभयो । अन्ततः अयारीको सुरुवाती गोल नै निर्णायक बन्यो र ब्राइटनले तीन अंक सुरक्षित गर्‍यो । यो जितसँगै ब्राइटनले सिटीसँगको अंक दूरी दुईमा झारेको छ । सिटी २१ अंकसहित शीर्ष स्थानमा रहे पनि अर्को खेलमा लिभरपुलसँग आर्सनल पराजित नभए उसले दोस्रो स्थान गुमाउनेछ । एक खेल कम खेलेको आर्सनलको पनि २१ अंक छ । तेस्रो स्थानमा रहेको ब्राइटनले भने १९ अंक जोडेको छ । म्यानचेस्टर युनाइटेडको खराब लयले निरन्तरता पायो । स्टामफोर्ड ब्रिजमा चेल्सीसँग २-० ले पराजित भएपछि युनाइटेडको जितविहीन यात्रा नौ खेल पुगेको छ । सन् १९८८ यताकै सबैभन्दा खराब लयबाट गुज्रिरहेको युनाइटेडका लागि यो हारले थप संकट निम्त्याएको छ । चेल्सीका लागि मोर्गन रोजर्सले खेलको ५०औँ मिनेटमा गोल गर्दै घरेलु टोलीलाई अग्रता दिलाउनुभयो । दोस्रो हाफमा युनाइटेडको रक्षापंक्ति सम्हालिन नसक्दा चेल्सीले खेलमा पकड बनाएको थियो । त्यसको केही समयपछि लिसान्द्रो मार्टिनेज रातो कार्ड पाउँदै मैदानबाट बाहिरिएपछि युनाइटेड १० खेलाडीमा सीमित भयो । खेलको ६४औँ मिनेटमा चेल्सीले पेनाल्टी पायो । कोल पाल्मरले त्यसलाई गोलमा परिणत गर्दै टोलीको अग्रता दोब्बर बनाउनुभयो । यो गोलसँगै पाल्मरले प्रिमियर लिगमा आफ्नो ५०औँ गोल पूरा गर्नुभएको छ । उहाँको गोलले चेल्सीको जित सुनिश्चित गर्दा युनाइटेड भने थप दबाबमा परेको छ । लगातार खराब नतिजाका कारण प्रशिक्षक माइकल क्यारिकको जिम्मेवारीमाथि समेत प्रश्न उठ्न थालेको छ । शनिबारका अन्य खेलको नतिजापछि युनाइटेड रेलिगेसन क्षेत्रमा पुग्न सक्ने अवस्था बनेको छ । शनिबार राती नै भएका अन्य खेलमा बोर्नमाउथले लिड्स युनाइटेडलाई २-०, ब्रेन्टफोर्डले नटिङ्घम फरेस्टलाई २-० र कभेन्ट्री सिटीले सन्डरल्याण्डलाई ३-१ ले पराजित गरे । हल सिटी र इप्सविच टाउनले भने २-२ को बराबरी खेले । इंग्ल्याण्डमा म्यानचेस्टरका दुवै क्लब निराशाजनक नतिजाबाट गुज्रिरहेका बेला स्पेनमा बार्सिलोनाले भने आक्रामक प्रदर्शन गर्दै लगातार दुई हारको निराशा भुलाएको छ । घरेलु मैदानमा आलाभेसलाई ६-१ ले पराजित गर्दै बार्सिलोनाले ला लिगाको शीर्ष स्थानमा आफ्नो पकड कायम राखेको हो । रियल मड्रिडसँग २-१ ले पराजित भएपछि बार्सिलोनाको प्रदर्शनमाथि प्रश्न उठेको थियो । त्यसपछि च्याम्पियन्स लिगमा पेरिस सेन्ट-जर्मेन (पिएसजी)सँग ४-२ को हार बेहोरेपछि प्रशिक्षक हान्सी फ्लिकले टोलीको प्रदर्शनप्रति असन्तुष्टि व्यक्त गर्नुभएको थियो । तर, आलाभेसविरुद्धको खेलमा बार्सिलोनाले ती आलोचनाको जवाफ मैदानबाटै दिएको छ । जर्मनीमा भने बालोन डी’ओर विजेता बनेपछि पहिलो खेल खेल्नुभएका ह्यारी केनले व्यक्तिगतरूपमा सम्झनलायक प्रदर्शन गर्न सक्नुभएन । उहाँले पेनाल्टीमा गोल गर्न नसकेको रात बायर्न म्युनिख र बोरुसिया डर्टमन्डबीचको ‘डेर क्लासिकर’ २–२ को बराबरीमा सकियो । खेलअघि बायर्नले केनको सम्मानमा विशेष समारोह आयोजना गरेको थियो । बालोन डी’ओर जितेपछि पहिलोपटक मैदान उत्रिनुभएका केनले सम्मानस्वरूप गोल्डेन जुत्ता लगाउनुभएको थियो । म्युनिखको टेलिभिजन टावरमा समेत उहाँको विशाल तस्वीर प्रदर्शन गरिएको थियो । समर्थकहरूले पनि विशेष पहिरन लगाएर उहाँको उपलब्धिको उत्सव मनाएका थिए । पहिलो हाफमा केनको भली प्रहार डर्टमन्डका फेलिक्स निमेचाको फैलिएको हातमा लागेपछि बायर्नले पेनाल्टी पाएको थियो । सन् २०२५-२६ को सिजनमा बायर्नका लागि १७ पेनाल्टी गोल गर्नुभएका केन यसपटक भने चुक्नुभयो । उहाँको प्रहार क्रसबारमा लागेर फर्किएको थियो । त्यसपछि पनि उहाँले गोल गर्ने अवसर पाउनुभयो । बायर्नको तीव्र प्रत्याक्रमणमा उहाँको अर्को प्रहार पनि क्रसबारमा लाग्यो भने त्यसलगत्तै गरेको अर्को प्रहार पोस्टको छेउबाट बाहिरियो । लगातार अवसर पाए पनि गोल गर्न नसक्नुभएका केनले टोलीको दोस्रो गोलमा भने महत्त्वपूर्ण भूमिका निर्वाह गर्नुभयो । केनले गत सिजन क्लब र देशका लागि कुल ७३ गोल गर्नुभएको थियो । यही असाधारण प्रदर्शनका आधारमा उहाँले बालोन डी’ओर जित्नुभएको हो । उहाँ ४५ वर्षपछि बालोन डी’ओर जित्ने पहिलो बायर्न खेलाडी तथा २५ वर्षपछि उक्त अवार्ड जित्ने पहिलो इंग्लिस खेलाडी बन्नुभएको थियो । एजेन्सी