‘सारथि’ को अफिसियल पोस्टर सार्वजनिक, मंसिर ११ देखि प्रदर्शनमा आउने

काठमाडौं । कुमार गजुरेलको लेखन तथा निर्देशनमा बनेको नेपाली चलचित्र ‘सारथि’ को अफिसियल पोस्टर सार्वजनिक गरिएको छ । म्याग्दीको गुर्जा क्षेत्रमा छायांकन गरिएको यो चलचित्र आगामी मंसिर ११ गते (नोभेम्बर २७) देखि देशभरका सिनेमा हलमा प्रदर्शनमा आउने भएको छ । सार्वजनिक पोस्टरमा गुर्जा क्षेत्रको हिमाली सौन्दर्य र चलचित्रका मुख्य पात्रलाई प्रस्तुत गरिएको छ । चलचित्रमार्फत गिरि विश्वकर्मा र गायत्री जोशीले अभिनयमा डेब्यु गर्दैहुनुहुन्छ । साथै, निरुता सिंह र उत्तम प्रधान करिब दुई दशकपछि एउटै चलचित्रमा देखिँदै हुनुहुन्छ । किम्भे प्रोडक्सनको निर्माण तथा धिरज इन्फिनिटी फिल्म्सको सहकार्यमा बनेको यस चलचित्रमा निरुता सिंह, उत्तम प्रधान, मुकुन्द श्रेष्ठ, राजेन्द्र केसी, सम्रान्त थापालगायत कलाकारको अभिनय छ । तारा थापा ‘किम्भे’ प्रस्तुतकर्ता रहेको चलचित्रका निर्माता रदिप श्रेष्ठ र प्रदीप रायमाझी हुनुहुन्छ । संकल्प भुजेलको छायांकन, तारा थापा ‘किम्भे’को सम्पादन तथा बाबुल गिरी र प्रशान्त शिवाकोटीको संगीत रहेको चलचित्रको वितरण आरआर फिल्म्सले गर्नेछ । हिमाली जनजीवन, स्थानीय संस्कृति, परम्परा, सामाजिक सम्बन्ध र मानवीय संवेदनालाई कथावस्तुमा समेटिएको निर्माण पक्षले जनाएको छ ।