काठमाडौं । साबा महिला बास्केटबल च्याम्पियनसिप आगामी डिसेम्बर ६ देखि १० तारिखसम्म भारतको चेन्नाईमा आयोजना हुने भएको छ । फिफा महिला एसिया कप २०२७ डिभिजन ‘बी’ साबा क्वालिफायर्सअन्तर्गत दक्षिण एसियाली टोलीबीच हुने प्रतियोगिता चेन्नाईस्थित जवाहरलाल नेहरू इन्डोर स्टेडियममा सञ्चालन हुनेछ । प्रतियोगितामा आयोजक भारतसहित नेपाल, माल्दिभ्स र श्रीलंकाले प्रतिस्पर्धा गर्नेछन् । सिंगल राउण्ड रोबिनका आधारमा हुने प्रतियोगितामा प्रत्येक टोलीले एकअर्कासँग प्रतिस्पर्धा गर्नेछन् । लिग चरणको समाप्तिपछि शीर्ष दुई टोलीबीच उपाधिका लागि फाइनल खेल हुनेछ भने तेस्रो र चौथो स्थानमा रहने टोलीले तेस्रो स्थानका लागि प्रतिस्पर्धा गर्नेछन् । नेपालले प्रतियोगिताको उद्घाटन दिन अर्थात् डिसेम्बर ६ मा आयोजक भारतसँग खेल्दै आफ्नो यात्रा सुरु गर्नेछ । नेपालले डिसेम्बर ७ मा माल्दिभ्स र डिसेम्बर ८ मा श्रीलंकासँग प्रतिस्पर्धा गर्ने तालिका छ । साबा च्याम्पियनसिपको विजेता टोलीले फिफा महिला एसिया कपमा सिधै स्थान बनाउनेछ । उपविजेता टोलीको छनोट प्रक्रियाबारे भने अन्तर्राष्ट्रिय बास्केटबल महासंघ (फिबा) ले अन्तिम निर्णय गर्न बाँकी रहेको राष्ट्रिय महिला बास्केटबल टोलीका मुख्य प्रशिक्षक विकास शाहीले जानकारी दिनुभयो । प्रतियोगिताका लागि नेपाली महिला बास्केटबल टोली हाल प्रशिक्षणमा छ । नेपाल बास्केटबल संघका अध्यक्ष भीमसिंह गुरुङका अनुसार प्रतियोगिताका लागि छिट्टै १२ सदस्यीय अन्तिम टोली घोषणा गरिनेछ । साबा बास्केटबलमा सहभागी हुने राष्ट्रिय टोलीका खेलाडीले दशौँ राष्ट्रिय खेलकुद प्रतियोगितामा भने प्रतिस्पर्धा नगर्ने भएका छन् । राष्ट्रिय खेलकुद मंसिर १६ गतेदेखि कर्णाली प्रदेशको सुर्खेतमा सुरु हुँदैछ । महिला बास्केटबलको प्रतिस्पर्धा भने मंसिर ८ गतेदेखि नै सञ्चालन हुनेछ । राष्ट्रिय खेलकुदमा सहभागी भएलगत्तै अन्तर्राष्ट्रिय प्रतियोगिताका लागि भारत जानुपर्ने हुँदा खेलाडीको यात्रा, शारीरिक अवस्था र तयारीमा असर पर्न सक्ने भएकाले साबा प्रतियोगितालाई प्राथमिकता दिँदै राष्ट्रिय खेलकुदमा सहभागी नगराउने निर्णय गरिएको प्रशिक्षक शाहीले जानकारी दिनुभयो ।
साबा महिला बास्केटबल डिसेम्बर ६ देखि चेन्नाईमा

Read Complete Original Article
Published originally on हिमालय टाइम्स






