स्याङ्जा । स्याङ्जाको वालिङस्थित पूर्णामृत भवानी माध्यमिक विद्यालयको स्वामित्वमा रहेको २९ रोपनीभन्दा बढी जग्गा सशस्त्र प्रहरी बललाई उपलब्ध गराउने मन्त्रिपरिषद्को निर्णयपछि विवाद उत्पन्न भएको छ। विद्यालयको सहमतिबिनै जग्गाको स्वामित्व हस्तान्तरण प्रक्रिया अघि बढाइएको भन्दै विद्यालय परिवारले निर्णयप्रति आपत्ति जनाएको छ। वालिङ नगरपालिका–८ मा रहेको कित्ता नम्बर ४८२ को २९ रोपनी ५ आना २ पैसा १ दाम जग्गाको स्वामित्व सशस्त्र प्रहरी बल नं. ३० गुल्म हेडक्वार्टर स्याङ्जाको नाममा कायम गर्ने गरी आवश्यक प्रक्रिया अघि बढाउन असोज १९ गते बसेको मन्त्रिपरिषद् बैठकले स्वीकृति दिएको थियो। तत्कालीन माओवादी विद्रोहका क्रममा २०५८ मंसिर ५ गते स्याङ्जा र वालिङका प्रशासनिक तथा सुरक्षा निकायमाथि आक्रमण भएपछि २०६० सालमा सशस्त्र प्रहरी बलको स्थापना गरिएको थियो। सुरुमा भकुन्डेस्थित सहकारी संस्थाको भवनमा राखिएको सशस्त्र प्रहरीलाई पछि पूर्णामृत भवानी माविको स्वामित्वमा रहेको घ्याङलिङस्थित जग्गामा अस्थायी बेसक्याम्प बनाएर राखिएको थियो। हाल पनि सशस्त्र प्रहरी गुल्म सोही जग्गामा अस्थायी संरचना निर्माण गरी बस्दै आएको छ। विद्यालयका प्रधानाध्यापक दीपक लम्सालका अनुसार उक्त जग्गा दाताबाट विद्यालयलाई प्राप्त भएको हो। विद्यालयले भविष्यमा मेडिकल, बायो–इन्जिनियरिङ, कृषि, वनविज्ञान तथा इन्जिनियरिङलगायत प्राविधिक विषयको पठनपाठन सञ्चालन गर्ने योजना बनाएकाले जग्गा शैक्षिक प्रयोजनका लागि आवश्यक रहेको उनले बताए। सशस्त्र प्रहरीलाई जग्गा आवश्यक भए उपयुक्त अर्को स्थानमा व्यवस्थापन गर्नुपर्ने प्रधानाध्यापक लम्सालको आग्रह छ। विद्यालयले आफ्नो चल–अचल सम्पत्ति शैक्षिक गतिविधिमा उपयोग गर्न पाउने वातावरण बनाउन सरकार तथा सम्बन्धित निकायको ध्यानाकर्षणसमेत गराएको छ।
सशस्त्र प्रहरीलाई विद्यालयको २९ रोपनी जग्गा दिने निर्णयपछि विवाद

Read Complete Original Article
Published originally on केन्द्रबिन्दु






