विशेष महाधिवेशनलाई बदनाम गर्न सरकारले भ्रम फैलाएको कांग्रेसको आरोप

काठमाडौं । नेपाली कांग्रेसले पार्टीको आधिकारिकता विवादमा सरकारले नियोजित रूपमा भ्रम फैलाएको आरोप लगाएको छ । पार्टी केन्द्रीय कार्यालय सानेपामा बुधबार बसेको शीर्ष नेताहरूको बैठकपछि आयोजित पत्रकार सम्मेलनमा वरिष्ठ उपसभापति विश्वप्रकाश शर्माले सरकारको निश्चित गृहबाट प्रायोजित रूपमा भ्रम फैलाउने काम भइरहेको दाबी गरेका हुन् । शर्माले कांग्रेसको विशेष महाधिवेशनमा आर्थिक चलखेल भएको भन्दै सार्वजनिक गरिएका विषयहरू असत्य भएको जिकिर गरे । उनले आर्थिक चलखेलको आरोपलाई प्रायोजन गर्ने ढङ्गले बजारमा ल्याउनु महाधिवेशन प्रतिनिधिहरूको अपमान भएको बताए । ‘आर्थिक चलखेल भएको कुरालाई प्रायोजन गर्ने ढङ्गले बजारमा लगिनु भनेको नेपाली कांग्रेसका महाधिवेशन प्रतिनिधिहरूको अपमान हो,’ उनले भने । शर्माका अनुसार पार्टी विधानको धारा १७ (२) बमोजिम महाधिवेशन प्रतिनिधिहरूको सहभागितामा विशेष महाधिवेशन सम्पन्न भएको हो । त्यसपछि पार्टीको १५औँ महाधिवेशन प्रक्रिया पूरा भएको र निर्वाचन आयोगले त्यसलाई अद्यावधिक गरिसकेको उनले बताए । ‘विशेष महाधिवेशनपछि संवैधानिक निकाय निर्वाचन आयोगले अद्यावधिक गर्‍यो । अहिले यसरी प्रश्न उठाइनु भनेको निर्वाचन आयोगको पनि अपमान हो,’ शर्माले भने । पार्टीको आधिकारिकतासम्बन्धी विषय अदालतसम्म पुगेको र लामो बहसपछि सर्वोच्च अदालतले निर्वाचन आयोगले गरेको अद्यावधिकलाई सही ठहर गरेको उनको दाबी छ । यस्तो अवस्थामा आर्थिक चलखेलको आरोप लगाएर करोडौँको कथा फैलाउनु निर्वाचन आयोगको अनादर र सर्वोच्च अदालतको अवहेलना भएको उनले टिप्पणी गरे । कांग्रेसको १५औँ महाधिवेशन सात हजारभन्दा बढी प्रतिनिधिको सहभागितामा सम्पन्न भएको उल्लेख गर्दै शर्माले त्यसबाट निर्वाचित कार्यसमिति विधि र प्रक्रियाअनुसार अघि बढिरहेको बताए । पत्रकार सम्मेलनमा शर्माले सञ्चारमाध्यममाथि भइरहेको दबाब र त्रासप्रति पनि आपत्ति जनाए । सञ्चारगृहको गेटमा गाडी तेर्स्याएर अवरोध गरिएको घटनाबारे राष्ट्रिय स्वतन्त्र पार्टीले छानबिन गर्न निर्देशन दिएको प्रसंग उल्लेख गर्दै उनले सरकारको कदम र कार्यशैलीमाथि प्रश्न उठाए । सरकारले सञ्चारमाध्यममाथि अनुचित दबाब बढाउनुका साथै विपक्षी दललाई बदनाम गर्न तथ्यहीन आरोप फैलाउने काम गरेको उनको आरोप थियो । उनले यस्ता गतिविधि तत्काल रोक्न सरकारलाई चेतावनीसमेत दिए ।