विराटनगरलाई हराउँदै लुम्बिनी प्लेअफमा, चार टोलीको टुङ्गो

काठमाडौं । विराटनगर किंग्स तेस्रो संस्करणको नेपाल प्रिमियर लिग (एनपीएल) को प्लेअफ दौडबाट बाहिरिएको छ। शनिबार सम्पन्न खेलमा लुम्बिनी लायन्ससँग ४ विकेटले पराजित भएपछि विराटनगरको यात्रा समूह चरणमै समाप्त भएको हो। यो जितसँगै लुम्बिनीले प्लेअफमा स्थान सुरक्षित गरेको छ। यससँगै प्लेअफ खेल्ने चारवटै टोलीको टुङ्गो लागेको छ। लुम्बिनी लायन्स, सुदूरपश्चिम रोयल्स, काठमाडौं गोर्खाज र चितवन राइनोज प्लेअफमा पुगेका छन्। पोखरा एभेन्जर्स, कर्णाली याक्स, जनकपुर बोल्ट्स र विराटनगर किंग्स भने समूह चरणबाटै बाहिरिएका छन्। विराटनगरले दिएको १६७ रनको लक्ष्य लुम्बिनीले १९.५ ओभरमा ६ विकेट गुमाएर पूरा गर्‍यो। लुम्बिनीका ओपनर डार्सी सर्ट र आसिफ शेखले समान ४५ रन बनाए। त्यस्तै अली शेखले २७ तथा सन्दीप जोराले अविजित २५ रनको योगदान दिए। ११ बल सामना गरेका जोराले ३ छक्का र १ चौका प्रहार गरे। रुवेन ट्रम्पलमानले अन्तिम ओभरमा छक्का प्रहार गर्दै लुम्बिनीलाई जित दिलाए। बलिङतर्फ विराटनगरका अपराजित पौडेलले २ तथा चरिथ असलंका र रुपेश सिंहले समान १ विकेट लिए। त्यसअघि कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ४ विकेट गुमाएर १६६ रन बनाएको थियो। विराटनगरका चरिथ असलंकाले अर्धशतकीय पारी खेले। उनले ४३ बलमा ६ छक्का र १ चौकाको मद्दतमा ६४ रन बनाए। शुभम रञ्जानेले अविजित ३१ तथा इमरान शेखले २४ रन जोडे। शेख रिटायर्ड हर्ट भएका थिए। लोकेश बमले १५ रन बनाए। बलिङतर्फ लुम्बिनीका किशोर महतोले २ तथा अभिषेक गौतम र रुवेन ट्रम्पलमानले समान १ विकेट लिए।