विदेशी विद्यार्थीको रोजाइमा जर्मनीको आकर्षण, अमेरिका र क्यानडामा ठूलो गिरावट

काठमाडौं । विदेशमा उच्च शिक्षा हासिल गर्ने सपना बोकेका विद्यार्थीमाझ जर्मनीको आकर्षण तीव्र गतिमा बढिरहेको छ । विश्वका प्रमुख अंग्रेजीभाषी देशहरूमा विदेशी विद्यार्थीको संख्या घटिरहेका बेला जर्मनीमा भने अन्तर्राष्ट्रिय विद्यार्थीको संख्या उल्लेख्य रूपमा बढेको छ । आर्थिक सहयोग तथा विकास संगठन (ओईसीडी)को पछिल्लो प्रतिवेदनअनुसार, सन् २०२५ मा जर्मनी आउने विदेशी विद्यार्थीको संख्या अघिल्लो वर्षको तुलनामा ४५ प्रतिशतले बढेको छ । प्रतिवेदनमा उल्लेख भएअनुसार, उक्त वर्ष विश्वभरबाट करिब ७४ हजार विद्यार्थी अध्ययनका लागि जर्मनी पुगेका थिए । पछिल्लो ६ वर्षमा जर्मनीमा विदेशी विद्यार्थीको संख्या झन्डै दोब्बर भएको छ । विदेशी विद्यार्थी आकर्षित गर्ने मामिलामा अस्ट्रिया र इटालीले पनि प्रगति गरेका छन् । शिक्षा प्रणालीसम्बन्धी समस्यालाई लिएर विरोध प्रदर्शन भइरहेका बेला पनि फ्रान्सले अन्तर्राष्ट्रिय विद्यार्थीलाई आकर्षित गर्न सफल भएको प्रतिवेदनले देखाएको छ । यसको विपरीत, लामो समयदेखि विदेशी विद्यार्थीका प्रमुख गन्तव्य मानिँदै आएका अमेरिका र क्यानडामा विद्यार्थीको संख्या उल्लेख्य रूपमा घटेको छ । प्रतिवेदनअनुसार, क्यानडामा विदेशी विद्यार्थीको संख्या ५७ प्रतिशत र अमेरिकामा ३३ प्रतिशतले घटेको छ । ओईसीडीका ३८ सदस्य राष्ट्रमा समग्र रूपमा विदेशी विद्यार्थीको संख्या घटेको प्रतिवेदनमा उल्लेख छ । सन् २०२४ मा यी देशमा करिब १९ लाख विदेशी विद्यार्थी अध्ययनका लागि पुगेका थिए भने सन् २०२५ मा यो संख्या घटेर १६ लाखमा झरेको थियो । सन् २०२३ यता विदेशी विद्यार्थीको संख्या निरन्तर घटिरहेको प्रतिवेदनले देखाएको छ ।