वार्नरको अर्धशतकमा काठमाडौंले लुम्बिनीलाई दियो १६१ रनको लक्ष्य

काठमाडौं । सिद्धार्थ बैंक नेपाल प्रिमियर लिग (एनपीएल)अन्तर्गत काठमाडौं गोर्खाजले लुम्बिनी लायन्सलाई मध्यम लक्ष्य प्रस्तुत गरेकाे छ । कीर्तिपुरमा टस हारेर पहिले ब्याटिङ गरेको काठमाडौं गोर्खाजले निर्धारित २० ओभरमा ८ विकेट गुमाएर १६० रन बनाएको हाे । इनिङ्सको सुरुआतमा ओपनरद्वय साहिल पटेल र डेभिड वार्नरले उत्कृष्ट साझेदारी गर्दै पहिलो विकेटका लागि १०४ रन जाेडेका थिए। साहिल पटेलले ३६ बलमा ३८ रन बनाए भने डेभिड वार्नरले ५० बलमा ९ चौका र १ छक्का प्रहार गर्दै ६६ रनको उत्कृष्ट पारी खेले। एनपीएलमा वार्नरको यो पहिलो अर्धशतक हो। त्यसैगरी, सहर अराचचिगेले आक्रामक ब्याटिङ गर्दै १५ बलमा ३ चौका र १ छक्काको मद्दतले नटआउट ३४ रन जोडे। कप्तान करण केसीले ९ रन बनाए भने अन्य ब्याट्सम्यानहरूले दोहोरो अंक छुन सकेनन्। लुम्बिनी लायन्सतर्फ बलिङमा शेर मल्ल, रुबेन ट्रम्पेलम्यान र अभिशेष गौतमले उत्कृष्ट प्रदर्शन गर्दै समान २-२ विकेट हात पारे।