रिलिजअघि नै १०० करोड नजिक पुग्यो ‘रामायण’, एडभान्स बुकिङबाट ९६ करोड कमाइ

काठमाडौं । रणवीर कपुर अभिनीत फिल्म ‘रामायण : पार्ट वन’ प्रदर्शनमा आउनुअघि नै बक्स अफिसमा ठूलो रेकर्ड बनाउने दिशामा अघि बढेको छ । नोभेम्बर ५ अर्थात् बिहीबारदेखि प्रदर्शनमा आउने फिल्मले रिलिज हुनुअघि नै भारतमा एडभान्स बुकिङबाट ९६ करोड ५६ लाख भारतीय रुपैयाँ ग्रस कलेक्सन गरेको छ । ट्रेड वेबसाइट स्याकनिल्कका अनुसार नोभेम्बर ४ बिहान ७ बजेसम्म फिल्मका लागि पाँच दिनका ८३ हजार ३२ शोमा २५ लाख ६५ हजार टिकट बिक्री भएका छन् । यसमा सिनेमा हलले ब्लक गरेका सिटसमेत समावेश छन् । ब्लक गरिएका सिटको टिकट संख्या हटाउँदा फिल्मको एडभान्स बुकिङबाट भएको कमाइ ७७ करोड ३१ लाख भारतीय रुपैयाँ र बिक्री भएका टिकटको संख्या २० लाख ५७ हजारमा झर्छ । फिल्मको एडभान्स बुकिङमा प्रदर्शनको पहिलो दिन नोभेम्बर ५ सबैभन्दा अगाडि छ । पहिलो दिनका लागि ३९ करोड ३५ लाख भारतीय रुपैयाँको ग्रस एडभान्स बुकिङ भएको छ । ब्लक सिट हटाउँदा यो रकम ३३ करोड ३४ लाख रुपैयाँ हुन्छ । त्यस्तै, शुक्रबारका लागि १८ करोड ५३ लाख, शनिबारका लागि १९ करोड ६८ लाख, आइतबारका लागि १३ करोड २३ लाख र सोमबारका लागि ५ करोड ७८ लाख रुपैयाँको एडभान्स बुकिङ भएको छ । फिल्मको घरेलु बजारमा हिन्दी संस्करणको माग सबैभन्दा बढी देखिएको छ । आइतबारको बुकिङ विवरणअनुसार हिन्दी संस्करणले १४ हजार ३१० शोमार्फत १० करोड ७८ लाख भारतीय रुपैयाँको ग्रस एडभान्स बुकिङ गरेको छ । यो आइतबारको कुल ग्रस एडभान्स बुकिङको करिब ८२ प्रतिशत हो । तेलुगु संस्करणबाट १ करोड ३५ लाख, कन्नडबाट ९५ लाख ६ हजार, तमिलबाट १४ लाख २० हजार र मलयालम संस्करणबाट ३७ हजार ८७० रुपैयाँको एडभान्स बुकिङ भएको छ । फिल्मको थ्रीडी संस्करणप्रति पनि दर्शकको आकर्षण देखिएको छ । आइतबारको तथ्यांकअनुसार स्ट्यान्डर्ड थ्रीडी शोबाट ७ करोड १४ लाख र स्ट्यान्डर्ड टुडी शोबाट ३ करोड ८२ लाख रुपैयाँको एडभान्स बुकिङ भएको छ । त्यस्तै, आईम्याक्स, फोरडीएक्स, डल्बी सिनेमा, स्क्रिन एक्स, एपिक र आईसजस्ता प्रिमियम फर्म्याटबाट कुल २ करोड २२ लाख रुपैयाँको बुकिङ भएको छ । सहरगत बुकिङमा मुम्बई सबैभन्दा अगाडि छ । आइतबार मुम्बईमा १ करोड ८६ लाख रुपैयाँको ग्रस एडभान्स बुकिङ भएको छ । दिल्ली–एनसीआरमा १ करोड ३४ लाख र बेंगलुरुमा १ करोड २७ लाख रुपैयाँको टिकट बिक्री भएको छ । हैदराबादमा ८६ लाख ११ हजार, पुणेमा ५६ लाख ९८ हजार र कोलकातामा ५६ लाख ५६ हजार रुपैयाँको बुकिङ भएको छ । राज्यगत रूपमा महाराष्ट्र २ करोड ८२ लाख रुपैयाँको बुकिङसहित अगाडि छ । कर्नाटकमा १ करोड ६५ लाख, दिल्लीमा १ करोड ३४ लाख र तेलंगानामा १ करोड १४ लाख रुपैयाँको एडभान्स बुकिङ भएको छ । नितेश तिवारीको निर्देशनमा बनेको फिल्मलाई नमित मल्होत्राले निर्माण गरेका हुन् । फिल्ममा रणवीर कपुर भगवान् राम, साई पल्लवी माता सीता र यश रावणको भूमिकामा देखिनेछन् । रवि दुबे र सनी देओलको पनि फिल्ममा महत्वपूर्ण भूमिका छ ।