रास्वपा सरकार कांग्रेसमा गुटबन्दी बढाउने खेलमा लागेको प्रदीप पौडेलको आरोप

काठमाडौं । नेपाली कांग्रेसका महामन्त्री प्रदीप पौडेलले राष्ट्रिय स्वतन्त्र पार्टी (रास्वपा) नेतृत्वको सरकारमाथि कांग्रेसको आन्तरिक राजनीतिमा हस्तक्षेप गरी पार्टीभित्र गुटबन्दी बढाउन खोजेको आरोप लगाएका छन्। उनले अन्य दलको नेतृत्व कमजोर बनाउने र आन्तरिक विवाद चर्काउने खेलमा सरकार लागेको दाबी गरेका हुन्। शुक्रबार जनकपुरमा आयोजित पत्रकार सम्मेलनमा बोल्दै पौडेलले सरकारले अन्य राजनीतिक दलको आन्तरिक मामिलामा हस्तक्षेप गरेर पुरानै शैलीको राजनीतिक सिन्डिकेट खडा गर्न खोजेको बताए। अन्य दलको सभापति कसलाई बनाउने, कसलाई बलियो बनाउने र कुन पार्टीलाई कमजोर पार्ने भन्ने खेलमा सरकार लाग्नु लोकतान्त्रिक अभ्यासविपरीत भएको उनको भनाइ थियो। बलियो जनमतसहित सरकार गठन भएको अवस्थामा जनताको अपेक्षाअनुसार काम गर्नुपर्नेमा अन्य दलको आन्तरिक राजनीतिमा हस्तक्षेप गर्नु उचित नभएको उनले बताए। विगतमा केही राजनीतिक दलका नेताहरू मिलेर गठबन्धनको सिन्डिकेटमार्फत शासन सञ्चालन गर्न खोजेको र कांग्रेसले त्यसलाई तोडेको प्रसंग उल्लेख गर्दै पौडेलले अहिले फेरि त्यस्तै राजनीतिक अभ्यास दोहोर्‍याउन खोजिएको आरोप लगाए। उनले रास्वपा नेतृत्वको सरकारलाई आफ्नै जनमतअनुसार काम गर्न र अन्य राजनीतिक दलको आन्तरिक मामिलामा हस्तक्षेप नगर्न सचेत गराए। ‘लोकतन्त्र भनेको विधिको शासन, जवाफदेहिता र फरक मतको सम्मान हो। जनताको विश्वास प्राप्त सरकारले अन्य दलमा गुटबन्दी र नियन्त्रणको राजनीति गर्नुभन्दा जनताको पक्षमा काम गर्नुपर्छ,’ पौडेलले भने।