‘रामायणः पार्ट १’ को विश्वव्यापी कमाइ १ हजार ११० करोड भारु, बनायो नयाँ रेकर्ड

मुम्बई । रणबीर कपुर अभिनीत बहुप्रतीक्षित चलचित्र ‘रामायणः पार्ट १’ ले बक्स अफिसमा आक्रामक व्यापार गर्दै नयाँ कीर्तिमान बनाएको छ। प्रदर्शनको नौ दिनमै चलचित्रले विश्वभरबाट १ हजार ११० करोड भारु ग्रस कलेक्सन गरेको छ। नितेश तिवारीको निर्देशनमा बनेको यो चलचित्र प्रदर्शनको आठ दिनमै १ हजार करोड भारु कमाउने तेस्रो तीव्र गतिका भारतीय चलचित्र बनेको छ। यसअघि रणवीर सिंह अभिनीत ‘धुरन्धर २’ र अल्लु अर्जुनको ‘पुष्पा २’ ले प्रदर्शनको सात दिनमै यो आँकडा पार गरेका थिए। चलचित्रको कमाइले शाहरुख खान अभिनीत ‘पठान’ को १ हजार ५५ करोड भारुको विश्वव्यापी कमाइको कीर्तिमानसमेत उछिनेको छ। ‘रामायणः पार्ट १’ ले भारतीय बजारबाट ६१२ करोड भारु नेट र ७३२ करोड भारु ग्रस कलेक्सन गरेको छ। त्यस्तै, विदेशी बजारबाट ३७८ करोड भारु ग्रस कमाइ गरेको छ। कुल विश्वव्यापी कमाइमा भारतीय बजारको हिस्सा करिब ६५ प्रतिशत र विदेशी बजारको योगदान ३५ प्रतिशत रहेको छ। प्रदर्शनको पहिलो सातामै सन् २०२६ को दोस्रो सर्वाधिक कमाउने हिन्दी चलचित्र बनेको ‘रामायणः पार्ट १’ ले ‘दृश्यम ३’, ‘जेलर २’ र ‘हनुमान अंश’ को कुल कमाइलाई समेत पछाडि पारेको छ। आठ दिनभित्रै हिन्दी सिनेमाको इतिहासमा छैटौँ सर्वाधिक कमाउने चलचित्र बन्न सफल भएको छ। हाल हिन्दी चलचित्रतर्फ सर्वाधिक कमाइको कीर्तिमान आमिर खान अभिनीत ‘दंगल’ को नाममा छ। उक्त चलचित्रले विश्वभरबाट २ हजार ५४ करोड भारु कमाएको थियो। समग्र भारतीय सिनेमाको कमाइ सूचीमा भने ‘रामायणः पार्ट १’ हाल ११औँ स्थानमा रहेको छ। यही गतिमा व्यापार जारी रहे चलचित्र शीर्ष १० मा प्रवेश गर्ने र ‘धुरन्धर’ लाई समेत चुनौती दिने अनुमान गरिएको छ। यद्यपि, चलचित्रको व्यावसायिक सफलतालाई लिएर नाफा–घाटाको हिसाब अझै महत्त्वपूर्ण देखिएको छ। चलचित्र व्यापार विश्लेषक सुमित कडेलका अनुसार यसको वास्तविक सफलता वितरकले पाउने सेयरमा निर्भर हुनेछ। निर्माण पक्षले अदालतमा चलचित्रको आधिकारिक बजेट २ हजार करोड भारु रहेको जानकारी दिएको प्रसङ्ग उल्लेख गर्दै कडेलले चलचित्रलाई हिट मान्न हिन्दी बजारबाट कम्तीमा १ हजार १०० करोड र विश्वभरबाट २ हजार ८०० करोड भारु कमाइ गर्नुपर्ने बताएका छन्। उनका अनुसार उक्त लक्ष्य पूरा नभएसम्म चलचित्रलाई व्यावसायिक रूपमा हिट भन्न मिल्दैन।