‘मधेसमा परिवर्तनको अनुभूति गराउन नसके अर्को चुनावमा भोट माग्न आउँदिनँ’ : रवि लामिछाने

जनकपुर । राष्ट्रिय स्वतन्त्र पार्टी (रास्वपा) का सभापति रवि लामिछानेले मधेसका जनताले यसपटक दिएको जनमतअनुसार परिवर्तनको अनुभूति गराउन नसके आगामी निर्वाचनमा भोट माग्न नआउने बताउनुभएको छ। शनिबार छठ पर्व मनाउन जनकपुरधाम पुग्नुभएका लामिछानेले विमानस्थलमा सञ्चारकर्मीसँग कुरा गर्दै मधेसी जनताको आशा र विश्वासलाई निराशामा बदल्न नहुने बताउनुभएको हो। उहाँले वर्तमान अवसर कुनै व्यक्तिको राजनीतिक प्रगति वा स्वार्थका लागि नभई मधेसी जनताको मुहारमा खुसी ल्याउन र उनीहरूको जीवनमा परिवर्तन गर्न प्राप्त भएको उल्लेख गर्नुभयो। जनताको जनमतको अपमान गर्दै आफ्ना निकटस्थलाई टिकट दिने र जनताको बस्तीमा परिवर्तनको अनुभूति गराउन नसक्ने हो भने आगामी निर्वाचनमा जनताले अहिले दिएको समर्थन फिर्ता लिन समय नलगाउने उहाँको भनाइ थियो। राजनीतिमा जनतालाई झुक्याएर भोट माग्ने प्रवृत्ति आफूलाई स्वीकार्य नरहेको उल्लेख गर्दै लामिछानेले जति बोलिएको छ, त्यति नै काम गरेर देखाउनुपर्नेमा जोड दिनुभयो। यसैगरी, उहाँले रास्वपाभित्र सरकारका कामकारबाहीबारे हुने आलोचना, सुझाव र बहसलाई पार्टी विभाजनको संकेतका रूपमा नबुझ्न आग्रह गर्नुभयो। आन्तरिक लोकतन्त्रमा विश्वास गर्ने पार्टी भएकाले आफ्नै सरकारका कामकारबाहीमाथि पनि आवश्यकताअनुसार आलोचना र सुझाव दिने गरिएको उहाँको भनाइ थियो। सरकारका केही काममा कमजोरी देखिँदा पार्टीभित्रै आलोचना र सुझाव आउनुलाई विवादका रूपमा व्याख्या गर्ने गरिएको उल्लेख गर्दै उहाँले त्यसलाई आन्तरिक लोकतन्त्रको अभ्यासका रूपमा बुझ्न आग्रह गर्नुभयो। सरकार आफ्ना प्रतिबद्धता पूरा गर्न सक्रिय रहेको दाबी गर्दै लामिछानेले पार्टीका नेता तथा कार्यकर्तालाई उच्च राजनीतिक चरित्र प्रदर्शन गर्न पनि आग्रह गर्नुभयो। उहाँले छठ पर्वको धार्मिक तथा सांस्कृतिक महत्त्वलाई ध्यानमा राखेर सरकारले सार्वजनिक बिदा दिएको प्रसंगसमेत उल्लेख गर्नुभयो। छठमा अस्ताउँदो र उदाउँदो दुवै सूर्यको उत्तिकै महत्त्व रहेकाले पर्वका सबै पक्षलाई सम्मान गरिएको उहाँको भनाइ थियो। लामिछानेले रास्वपाले मधेससहित देशभरका जनताको आवाज सुन्ने प्रतिबद्धता व्यक्त गर्दै जनताले दिएको विश्वास र अवसरलाई कुनै पनि हालतमा खेर जान नदिन पार्टी पंक्तिलाई आग्रह गर्नुभयो।