मधेशमा नयाँ सरकार गठनको प्रक्रिया सुरु, मुख्यमन्त्रीमा दाबी पेस गर्न आह्वान

जनकपुरधाम । मधेश प्रदेशका मुख्यमन्त्री कृष्णप्रसाद यादवले पदबाट राजीनामा दिएसँगै प्रदेशमा नयाँ सरकार गठनको प्रक्रिया अघि बढेको छ। प्रदेश प्रमुख सुरेन्द्रलाभ कर्णले मुख्यमन्त्री यादवको राजीनामा स्वीकृत गर्दै नेपालको संविधानको धारा १६८ को उपधारा (२) बमोजिम नयाँ मुख्यमन्त्री नियुक्तिका लागि प्रक्रिया अघि बढाउनुभएको हो। प्रदेश प्रमुखको कार्यालयले प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत जुटाउन सक्ने प्रदेशसभा सदस्यलाई मुख्यमन्त्रीमा नियुक्तिका लागि दाबी पेस गर्न आह्वान गरेको छ। संविधानको धारा १६८ को उपधारा (२) अनुसार प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्ने व्यवस्था छ। प्रदेश प्रमुखको कार्यालयले इच्छुक प्रदेशसभा सदस्यलाई आगामी मङ्सिर ४ गते शुक्रबार दिउँसो ४ बजेसम्म मुख्यमन्त्री पदमा नियुक्तिका लागि आफ्नो दाबी पेस गर्न समयसीमा तोकेको छ। यससँगै मधेश प्रदेशमा नयाँ सरकार गठनका लागि दलहरूबीच राजनीतिक समीकरण निर्माण गर्ने प्रक्रिया अघि बढ्ने भएको छ।