भीमफेदी दुर्घटनाको छानबिन गर्न पाँच सदस्यीय समिति गठन, सात दिनभित्र प्रतिवेदन बुझाउनुपर्ने

हेटौँडा । मकवानपुरको भीमफेदी–देउराली सडकखण्डमा १४ जनाको ज्यान जाने गरी भएको ईभी हाइस दुर्घटनाको कारण पत्ता लगाउन जिल्ला प्रशासन कार्यालय मकवानपुरले पाँच सदस्यीय छानबिन समिति गठन गरेको छ । दुर्घटनाको वास्तविक कारण पहिचान गर्नुका साथै आगामी दिनमा यस्ता घटना दोहोरिन नदिन आवश्यक उपाय सिफारिस गर्ने उद्देश्यले समिति गठन गरिएको हो । मकवानपुरका प्रमुख जिल्ला अधिकारी बसन्त अधिकारीका अनुसार सहायक प्रमुख जिल्ला अधिकारीको संयोजकत्वमा समिति गठन गरिएको छ । समितिमा जिल्ला ट्राफिक प्रहरी प्रमुख, नेपाल प्रहरीका प्रहरी निरीक्षक, बागमती प्रदेशको भौतिक पूर्वाधार विकास मन्त्रालयका इन्जिनियर र आन्तरिक मामिला तथा कानुन मन्त्रालयका कानुन अधिकृत सदस्य रहनेछन् । समितिलाई दुर्घटनास्थलको स्थलगत अध्ययन, प्राविधिक पक्षको विश्लेषण र दुर्घटनाका सम्भावित कारण पहिचान गरी सात दिनभित्र प्रतिवेदन पेस गर्न कार्यादेश दिइनेछ । जिल्ला सुरक्षा समितिको बैठकबाट आवश्यक निर्णय गरी छानबिन प्रक्रिया अघि बढाइने प्रजिअ अधिकारीले जानकारी दिनुभयो । प्रारम्भिक रूपमा चालकको थकान, पर्याप्त विश्रामको अभाव, तीव्र गति र क्षमताभन्दा बढी यात्रु बोकेको हुन सक्ने आशंका गरिएको छ । प्रजिअ अधिकारीका अनुसार दुर्घटनामा परेको ईभी हाइस राति अबेर काठमाडौं पुगेको थियो । काठमाडौं पुगेको उक्त गाडी बिहान करिब २ बजे सर्लाहीका लागि छुटेको थियो । बिहान ५ः१५ बजे देउराली पुगेको गाडी त्यसको करिब ३० मिनेटपछि ५ः४५ बजे चिसापानी नजिक दुर्घटनामा परेको थियो । रातभर सवारी सञ्चालनमा रहनु र चालकले पर्याप्त विश्राम नगरी पुनः लामो दूरीको यात्रा सुरु गर्नु दुर्घटनाको सम्भावित कारण हुन सक्ने प्रशासनको प्रारम्भिक आकलन छ । चालकले मोबाइलमा कुरा गर्दै सवारी चलाउनेजस्ता लापरबाहीका विषय पनि उठेको अधिकारीले बताउनुभयो । उहाँले सवारी साधनलाई निरन्तर सञ्चालनमा राख्ने प्रवृत्तिमाथि प्रश्न उठाउँदै चालक र सवारी दुवैलाई निश्चित समयको विश्राम आवश्यक रहेको बताउनुभयो । यात्रुले पनि चालकले नियमविपरीत गतिविधि गरेको देखेमा तत्काल खबरदारी गर्नुपर्ने उहाँको भनाइ छ । दुर्घटनापछि यात्रुको पहिचान र सनाखतमा देखिने समस्याप्रति पनि प्रशासनले चिन्ता व्यक्त गरेको छ । सवारी तथा यातायात व्यवस्था ऐन, २०४९ ले टिकट काउन्टरमै यात्रुको नाम र ठेगानासहितको विवरण राख्नुपर्ने व्यवस्था गरे पनि व्यवसायीले त्यसको प्रभावकारी कार्यान्वयन नगरेको अधिकारीले बताउनुभयो । यात्रुको विवरण व्यवस्थित नहुँदा दुर्घटनापछि आफन्तसँग सम्पर्क गर्न र मृतकको सनाखत गर्न कठिनाइ हुने गरेको उहाँको भनाइ छ । त्यसैगरी, दुर्घटना न्यूनीकरणका लागि मकवानपुरमा अभ्यासका रूपमा लागू गरिएको टाइम कार्ड प्रणालीलाई काठमाडौंमै व्यवस्थित र अनिवार्य बनाउनुपर्ने आवश्यकता उहाँले औँल्याउनुभयो । भीमफेदी–देउराली सडकखण्ड दुर्घटनाका दृष्टिले संवेदनशील बन्दै गएको उल्लेख गर्दै अधिकारीले सडकको अवस्था, सडक सुरक्षा संरचना, ट्राफिक सङ्केत, रोड फर्निचर तथा सम्बन्धित निकायको जिम्मेवारीसमेत छानबिनको दायरामा रहने बताउनुभयो । दुर्घटनामा ज्यान गुमाएका १४ जनामध्ये अधिकांश सर्लाहीको चक्रघट्टा गाउँपालिका–४ सुन्दरपुर बस्तीका रहेका छन् । दुर्घटनामा घाइते भएका ६ जनामध्ये तीन जनालाई थप उपचारका लागि चितवन र काठमाडौं पठाइएको छ भने अन्य तीन जनाको हेटौँडा अस्पतालमा उपचार भइरहेको छ । छानबिन समितिको प्रतिवेदन प्राप्त भएपछि दुर्घटनाको कारण र जिम्मेवार पक्ष पहिचान गरी आवश्यक थप प्रक्रिया अघि बढाइने जिल्ला प्रशासन कार्यालयले जनाएको छ ।