बैतडी । बैतडीमा बसबाट झर्ने क्रममा लडेर एक वृद्धको मृत्यु भएको छ। पाटन नगरपालिका–६ मेलतडाका ७० वर्षीय नारायण चन्दको बसबाट ओर्लिने क्रममा लडेर मृत्यु भएको हो। मेलौलीबाट महेन्द्रनगरतर्फ जाँदै गरेको म १ ख ९१९ नम्बरको बसबाट आइतबार बिहान करिब साढे १० बजे मेलतडामा झर्ने क्रममा चन्द ढोकाबाट लडेका थिए। लडेर गम्भीर घाइते भएका उनलाई उपचारका लागि जिल्ला अस्पताल बैतडी लगिएको थियो। तर, उपचारकै क्रममा चिकित्सकले मृत घोषणा गरेका जिल्ला प्रहरी कार्यालय बैतडीका प्रवक्ता प्रहरी निरीक्षक नवराज भट्टले जानकारी दिए। घटनापछि प्रहरीले बस र चालकलाई नियन्त्रणमा लिएको छ। नियन्त्रणमा लिइएका चालक मेलौली नगरपालिका–९ का ४८ वर्षीय अशोक चन्द हुन्।
बैतडीमा बसबाट ओर्लिने क्रममा लडेर वृद्धको मृत्यु

Read Complete Original Article
Published originally on केन्द्रबिन्दु






