सुर्खेत । यही मंसिर १६ देखि २७ गतेसम्म कर्णाली प्रदेशमा आयोजना हुने दशौँ राष्ट्रिय खेलकुद प्रतियोगिताका ३२ खेलको प्रतियोगितास्थल सार्वजनिक गरिएको छ । राष्ट्रिय खेलकुद परिषद्ले सार्वजनिक गरेको खेलस्थलसम्बन्धी विवरणअनुसार प्रतियोगिताका अधिकांश खेल सुर्खेतमा सञ्चालन हुनेछन् भने अन्य खेल कर्णालीका विभिन्न जिल्ला तथा लुम्बिनी प्रदेशका बाँके र बर्दियामा आयोजना गरिनेछन् । राष्ट्रिय खेलकुद परिषद्का सदस्य-सचिव रामचरित्र मेहताले सार्वजनिक गरेको विवरणअनुसार प्रतियोगितामा समावेश ३२ खेलमध्ये २२ खेल सुर्खेतमा सञ्चालन हुनेछन् । सुर्खेतमा एथ्लेटिक्स, महिला तथा पुरुष क्रिकेट, ह्याण्डबल, बास्केटबल, रग्बी, सेपकताक्रो, हक्की, भलिबल र कबड्डीका खेल हुनेछन् । त्यसैगरी कराते, ब्याडमिन्टन, फुल कन्ट्याक्ट कराते, टेबलटेनिस, उसु, तेक्वान्दो, जिम्न्यास्टिक, बक्सिङ, स्क्वास, आर्चरी, भारोत्तोलन, साइक्लिङ र ई-स्पोर्ट्सका प्रतिस्पर्धा पनि सुर्खेतकै विभिन्न खेलस्थलमा सञ्चालन गरिने परिषद्ले जनाएको छ । अन्य जिल्लातर्फ टेनिस तथा महिला र पुरुष खो-खो प्रतियोगिता बर्दियामा आयोजना हुनेछ । पौडी र सुटिङका खेल नेपालगञ्जमा सञ्चालन गरिनेछन् । त्यस्तै, जुडो र कुस्ती सल्यानमा, आइटिएफ तेक्वान्दो दैलेखमा, महिला तथा पुरुष फुटबलका सेमिफाइनल र फाइनल खेल जुम्लामा तथा बुद्धिचाल प्रतियोगिता कालीकोटमा सञ्चालन हुनेछ । शारीरिक सुगठन प्रतियोगिता भने पश्चिम रुकुममा आयोजना गरिनेछ । खेलस्थलको विवरणअनुसार सुर्खेतमा २२, बाँके र बर्दियामा दुई-दुई तथा सल्यानमा दुई खेल सञ्चालन हुनेछन् । त्यसैगरी जुम्ला, कालीकोट, दैलेख र रुकुम पश्चिममा एक-एक खेल आयोजना गरिनेछ । प्रतियोगिताले कर्णाली प्रदेशका विभिन्न जिल्लामा खेल पूर्वाधारको उपयोगसँगै खेलकुद गतिविधि विस्तार गर्ने अपेक्षा गरिएको छ । प्रतियोगिताका केही खेल औपचारिक उद्घाटनअघि नै मंसिर ८ गतेदेखि सुरु हुनेछन् । यद्यपि प्रतियोगिताको औपचारिक समुद्घाटन भने मंसिर १६ गते गरिने आयोजकले जनाएको छ । मंसिर २७ गतेसम्म सञ्चालन हुने प्रतियोगितामा देशभरका खेलाडीले विभिन्न विधामा प्रतिस्पर्धा गर्नेछन् । आयोजकका अनुसार दशौँ राष्ट्रिय खेलकुद प्रतियोगितामा करिब नौ हजार जनाको सहभागिता रहनेछ । जसमा छ हजार खेलाडी र तीन हजार अफिसियल्स सहभागी हुने अनुमान गरिएको छ । प्रतियोगितामा सातै प्रदेश, विभागीय टोली तथा सम्बन्धित खेल संस्थाका खेलाडीले सहभागिता जनाउनेछन् । कर्णाली प्रदेश खेलकुद विकास परिषद्का सदस्य-सचिव रवीन्द्र चन्दले प्रतियोगिताको तयारी अन्तिम चरणमा पुगेको जानकारी दिनुभएको छ । उहाँका अनुसार प्रतियोगितालाई व्यवस्थित, मर्यादित र प्रभावकारीरूपमा सम्पन्न गर्न आयोजक मूल समारोह समितिसहित विभिन्न १४ वटा समिति गठन गरी जिम्मेवारी बाँडफाँट गरिएको छ । कर्णाली प्रदेशमा पहिलोपटक राष्ट्रिय खेलकुद प्रतियोगिता आयोजना हुन लागेको सन्दर्भमा यसलाई प्रदेशको खेलकुद विकास, पर्यटन प्रवर्द्धन र आर्थिक गतिविधि विस्तारको अवसरका रूपमा समेत हेरिएको छ । प्रतियोगिताका लागि आवश्यक खेलस्थल व्यवस्थापन, पूर्वाधार तयारी, खेलाडी तथा अफिसियल्सको आवास, यातायात र सुरक्षा व्यवस्थापनलाई प्राथमिकतामा राखेर काम भइरहेको आयोजकले जनाएको छ ।दशौँ राष्ट्रिय खेलकुदले कर्णालीमा खेलकुदको नयाँ वातावरण सिर्जना गर्नुका साथै स्थानीयस्तरमा खेलप्रतिको आकर्षण बढाउने र प्रदेशको पहिचान राष्ट्रियस्तरमा स्थापित गर्न सहयोग पुग्ने अपेक्षा गरिएको छ । प्रतियोगिताको सफलताका लागि प्रधानमन्त्री बालेनको शुभकामनाप्रधानमन्त्री बालेन्द्र शाह (बालेन)ले कर्णाली प्रदेशमा आयोजना हुन लागेको दशौँ राष्ट्रिय खेलकुद प्रतियोगिताको सफलताको शुभकामना व्यक्त गर्नुभएको छ । आइतबार सामाजिक सञ्जाल फेसबुकमा स्टाटस लेख्दै प्रधानमन्त्री शाहले मंसिर ८ गतेदेखि सुरु हुने प्रतियोगिताले खेलकुदको विकाससँगै राष्ट्रिय एकता र आपसी सद्भावलाई थप बलियो बनाउने विश्वास व्यक्त गर्नुभएको हो । उहाँले राष्ट्रिय खेलकुद प्रतियोगितालाई घरेलु खेलकुदको सबैभन्दा ठूलो उत्सवको संज्ञा दिँदै यसपटक कर्णाली प्रदेशले पहिलोपटक यसको आयोजना गर्न लागेको उल्लेख गर्नुभएको छ । उहाँका अनुसार प्रतियोगिताले नयाँ खेलाडीको पहिचान गर्न, खेलाडीलाई प्रतिस्पर्धाको अवसर प्रदान गर्न तथा खेल पूर्वाधारको विकासमा महत्त्वपूर्ण योगदान पुर्याउनेछ । साथै, खेलकुदका माध्यमबाट कर्णालीको भूगोल, संस्कृति, इतिहास र आर्थिक सम्भावनालाई राष्ट्रियस्तरमा चिनाउन पनि प्रतियोगिताले भूमिका खेल्ने विश्वास उहाँको छ । प्रधानमन्त्री शाहले प्रतियोगितालाई सफल बनाउन नागरिकस्तरबाटै साथ र समर्थन प्राप्त हुने अपेक्षासमेत व्यक्त गर्नुभएको छ । हरेक दुई वर्षमा आयोजना गर्ने लक्ष्यसहित २०३८ सालमा सुरु भएको राष्ट्रिय खेलकुद प्रतियोगिताका अहिलेसम्म नौवटा संस्करणमात्रै आयोजना हुनुलाई उहाँले दुःखद पक्षका रूपमा औँल्याउनुभएको छ । अब सरकारले प्रतियोगितालाई यसको उद्देश्यअनुरूप नियमितरूपमा आयोजना गर्न र स्तर अभिवृद्धि गर्न गम्भीरतापूर्वक काम गर्ने प्रतिबद्धतासमेत जनाउनुभएको छ । दशौँ राष्ट्रिय खेलकुद प्रतियोगिताले खेलकुदको विकाससँगै राष्ट्रिय एकता र आपसी सद्भावलाई थप बलियो बनाउन प्रेरणा प्रदान गर्ने विश्वास व्यक्त गर्दै उहाँले प्रतियोगिताको सफल आयोजनाका लागि शुभकामना दिनुभएको छ । कर्णाली प्रदेशमा पहिलोपटक आयोजना हुन लागेको दशौँ राष्ट्रिय खेलकुद प्रतियोगिताले प्रदेशको आर्थिक गतिविधि विस्तार र पर्यटन प्रवर्द्धनको अवसर सिर्जना गर्ने अपेक्षा गरिएको छ । प्रतियोगिताका लागि प्रदेश सरकारले ४४ करोड १० लाख रुपैयाँ विनियोजन गरेको छ भने राष्ट्रिय खेलकुद परिषद्ले करिब ७२ करोड रुपैयाँ आवश्यक पर्ने प्रस्तावसहित तयारी अघि बढाएको छ ।
दशौँ राष्ट्रिय खेलकुदका ३२ खेलस्थल सार्वजनिक, सुर्खेतमा २२ खेल हुने

Read Complete Original Article
Published originally on हिमालय टाइम्स






