तिहारको उल्लासमा कलाकार : व्यस्तताबीच परिवार, सम्बन्ध र उत्सव

काठमाडौं । नेपालीहरूको दोस्रो महान् पर्व तिहार यतिबेला घरआँगनमा भित्रिने तयारीमा छ । शरद ऋतु आफैंमा चाडपर्वको उल्लास बोकेर आउने ऋतु हो । बडादशैँको रौनक सेलाउन नपाउँदै नेपालीहरूको घरआँगनमा तिहारको उमंग छाउने गर्दछ । झिलीमिली बत्ती, सयपत्री र मखमली फूलको सुगन्ध, देउसी-भैलोको गुञ्जन अनि मीठा परिकारको स्वादले वातावरण नै उत्सवमय बनेको छ । सांस्कृतिक, धार्मिक र सामाजिक दृष्टिले विशेष महत्त्व बोकेको तिहारलाई दीपावलीका रूपमा समेत चिनिन्छ । पाँच दिनसम्म मनाइने भएकाले यस पर्वलाई यमपञ्चक वा पञ्चक पनि भन्ने गरिन्छ । काग, कुकुर, गाई र गोरुजस्ता पशुपक्षीको पूजा गर्दै अन्तिम दिन भाइटीकाका माध्यमबाट दाजुभाइ तथा दिदीबहिनीबीचको प्रेम, सद्भाव र आत्मीयतालाई अझ प्रगाढ बनाउने यस पर्वको आफ्नै विशिष्ट महत्त्व छ । तिहार केवल धार्मिक आस्थाको पर्वमात्र होइन, पारिवारिक मिलन, आपसी सद्भाव र खुशी साटासाट गर्ने विशेष अवसर पनि हो । यही कारण धनी-गरिब, नेता-अभिनेता, सर्वसाधारणदेखि हरेक वर्ग र समुदायका मानिस आ-आफ्नै तरिकाले तिहारको स्वागत र तयारीमा जुटेका छन् । गाउँदेखि शहरसम्म घर, पसल र सार्वजनिकस्थल झिलीमिली बत्तीले सजिँदै छन् । फूल, मीठाई, मसला तथा विभिन्न परिकारको किनमेलले बजारमा छुट्टै चहलपहल थपेको छ । चाडपर्वको यो रौनकबाट नेपाली कलाकारहरू पनि अछुतो रहने कुरै भएन । वर्षभरि दर्शक तथा श्रोतामाझ आफ्नो कला प्रस्तुत गर्दै मनोरञ्जन दिलाउन व्यस्त रहने कलाकारहरूका लागि तिहार विशेष अवसर हो । यद्यपि, सबै कलाकारको तिहार मनाउने शैली र योजना भने एउटै हुँदैन । कोही चलचित्रको प्रचार-प्रसार तथा नयाँ परियोजनाको काममा व्यस्त हुन्छन् भने कोही देश-विदेशमा सांगीतिक कार्यक्रममार्फत दर्शक तथा श्रोतामाझ पुगिरहेका हुन्छन् । कतिपय कलाकार भने वर्षभरिको व्यस्तता र भागदौडलाई केही समय थाती राखेर परिवार, आफन्त र प्रियजनसँग तिहारको खुशी साट्न चाहन्छन् । पर्दामा र मञ्चमा अरूलाई हँसाउने, नचाउने र मनोरञ्जन दिलाउने कलाकारहरूको आफ्नै पारिवारिक संसारमा तिहारको रौनक कस्तो हुन्छ ? उनीहरू यस वर्षको तिहार कसरी मनाउँदैछन् ? कसका लागि तिहार कामको व्यस्तताबीचको अवसर बनेको छ भने कसका लागि परिवारसँग बिताउने अमूल्य समय ? यसै सन्दर्भमा केही कलाकारसँग कुराकानी गर्दा उनीहरूको तिहार मनाउने योजना, पारिवारिक सम्झना र चाडपर्वप्रतिको अनुभूति रोचक हुने अपेक्षा गर्न सकिन्छ । मनोरञ्जन दिलाउन दिनरात व्यस्त रहने कलाकारको यो तिहार मनाउने योजना कस्तो छ । कलाकारको तिहार योजना उहाँहरूकै शब्दमा :- धेरै वर्षपछि यसपालिको तिहार आफ्नै जन्मभूमिमा : ज्ञानेन्द्र गदाल, बरिष्ठ गीतकारधेरै वर्षपछि यसपालिको तिहार आफ्नै जन्मभूमि, आफ्नै गाउँ फिक्कलस्थित मूलघरमा मनाउने विशेष अवसर जुरेको छ । अझ विशेष कुरा त, आफ्नै दिदीबहिनीहरूको हातबाट भाइटीका लगाउने सौभाग्य मिल्दैछ । अरू दिदीबहिनीसँग अमेरिकामा रहँदा पनि भाइटीका लगाउने अवसर मिलेको थियो, तर मेरी कान्छी बहिनीसँग भने धेरै वर्षपछि टीका लगाउन पाउने कुराले मनमा छुट्टै उत्साह, उमंग र भावुकता थपेको छ । यसपालिको तिहार मेरा लागि केवल एउटा चाडपर्वमात्र होइन, बाल्यकालका ती अविस्मरणीय दिनहरूमा फर्किने सुन्दर अवसर पनि हो । गाउँघरको तिहार, घरआँगनको रमझम, दिदीबहिनीको माया, देउसी-भैलोको गुञ्जन, आफन्तजनसँगको भेटघाट र मौलिक नेपाली संस्कृतिको आत्मीय स्पर्श-यी सबैलाई फेरि एकपटक नजिकबाट अनुभूत गर्ने ठूलो रहर छ । परदेशमा रहँदा चाडपर्व मनाइयो, सम्झनाहरू साटियो, परम्परालाई निरन्तरता पनि दिइयो, तर जन्मभूमिको माटो, आफ्नै घरआँगन र परिवारसँगै मनाइने चाडपर्वको आनन्द र आत्मीयता नै बेग्लै हुँदो रहेछ । यसपालि फिक्कलको आफ्नै घरमा बाल्यकालको तिहार फेरि एकपटक बाँच्नेछु । पुराना सम्झना ताजा बनाउनेछु, सम्बन्धका न्यानोपनहरू सँगाल्नेछु र जीवनभर स्मरणीय रहने पलहरूमा रमाउनेछु । साँच्चै, यसपालिको तिहार विशेष हुनेछ : आफ्नोपनको, पारिवारिक मायाको, बाल्यकालको पुनरागमनको र आफ्नो मौलिक संस्कृति तथा परम्परासँग पुनः जोडिने अविस्मरणीय उत्सवको ! उल्लास, उमंग र आत्मीयताका साथ मनाउने योजना छ : अमर वान्तु, वरिष्ठ गीतकारतिहार मलाई सबैभन्दा प्रिय र रमाइलो लाग्ने चाड हो । झिलीमिली बत्ती, फूलमाला, दीयोको उज्यालो र देउसी–भैलोका मधुर धुनले तिहारलाई विशेष बनाउँछन् । तिहारको प्रसंग उठ्नेबित्तिकै मन बाल्यकालका ती अविस्मरणीय दिनहरूमा पुग्छ, जहाँ सानासाना कुरामै ठूलो खुशी र आनन्द मिल्थ्यो । दशैँमा आफन्त तथा मान्यजनबाट टीका र आशीर्वादसँगै दक्षिणा पाउँदाको खुशी, दिदीहरूसँग बसेर दक्षिणा गन्नुको रमाइलो र मावली जान पाउँदाको उत्साह आज पनि उत्तिकै ताजा छन् । तिहारका दिनमा भने राति घरमा कसैले थाहा नपाउने गरी दिदी र भाइसँग सुटुक्क निस्किएर धानबारी हुँदै टहरेघरमा खोटखोटे खेल्न जाने र रातभर रमाइलो गरेर बिहान घर फर्किने ती क्षणहरू झन् अविस्मरणीय छन् । सम्झिँदा आज पनि मन रोमाञ्चित हुन्छ । तर, समयसँगै समाज, जीवनशैली र चाडपर्व मनाउने परम्परा पनि बदलिँदै गएको छ । कुनै समय गाउँघरमा चाडपर्व आउनुअघि नै देखिने चहलपहल, आत्मीयता र उल्लास अहिले क्रमशः पातलिँदै गएको अनुभूति हुन्छ । पहिलेजस्तो रौनक र उमंग हराउँदै गएको हो कि भन्ने लाग्छ । यसपालिको तिहार काठमाडौंमै विशेष उल्लास र आत्मीयताका साथ मनाउने योजना छ । जहाँ रहेर, जसरी मनाए पनि तिहारले सबैको जीवनमा सुख, शान्ति, समृद्धि, सुस्वास्थ्य र आपसी सद्भावको उज्यालो छर्न सकोस् । विगतका सुनौला सम्झनालाई हृदयमा सजाउँदै वर्तमानलाई खुशीका साथ अँगाल्न र भविष्यलाई अझ सुन्दर बनाउन सकौं । आपसी प्रेम र सद्भाव बढाउने पर्व : उत्तम केसी, अध्यक्ष चलचित्र कलाकार संघगतवर्ष अष्ट्रेलियामा तिहार मनाएको थिए भने यो वर्ष नेपालमै मनाउँदै छु । दीपावली भनिए पनि हाम्रो तिहारको आफ्नै मौलिकता छ । यो नेपालीको विशेष पर्व हो । दाजुभाइ र दिदीबहिनीको विशेष पर्वका रूपमा यसलाई लिइन्छ । मेरो पुर्ख्यौली थलो नेपालटारमा तिहार मनाउँदै छु । तिहार केवल फूल र बत्तीले घर सजाउने पर्वमात्र होइन, यो सम्बन्धमा मीठास घोल्ने, आपसी प्रेम र सद्भाव बढाउने तथा खुशी साटासाट गर्ने अवसर पनि हो । यस्ता सांस्कृतिक र पारिवारिक आत्मीयताले भरिएका पर्वहरूले हाम्रो मौलिक संस्कृति, परम्परा र पहिचानलाई जीवन्त राखिरहेका छन् । उज्यालोको यो पावन पर्व तिहारले सबैको जीवनमा सुख, शान्ति, समृद्धि, सुस्वास्थ्य र खुशीको उज्यालो छर्न सकोस् । सबैका घरआँगनमा फूलझैँ मुस्कान फुलोस् र जीवन सधैं दीपावलीझैँ उज्यालो बनिरहोस् । सम्पूर्ण नेपाली दिदीबहिनी, दाजुभाइ तथा आमाबुबाहरूमा तिहारको हार्दिक मंगलमय शुभकामना व्यक्त गर्न चाहन्छु । तिहार आफैंमा अत्यन्त सुन्दर पर्व हो : मिथिला शर्मा, वरिष्ठ कलाकारचाडपर्वहरू परिवारका सदस्यहरूसँग मिलेर हर्षोल्लासका साथ मनाउन निकै रुचाउँछु । परिवारसँगै बसेर रमाइलो गर्नु, मीठा परिकार खानु र खुशी साटासाट गर्नु नै चाडपर्वको सबैभन्दा सुन्दर पक्ष हो । विशेषगरी, मलाई तिहार निकै मनपर्छ । तिहार आउनासाथ घरआँगन झिलीमिली बत्तीले सजिन्छन्, चारैतिर दियोको उज्यालो फैलिन्छ र मीठाई तथा फूलहरूको सुगन्धले वातावरण नै मनमोहक बनाउँछ । देउसी–भैलो, भाइटीका, रंगोली र परिवारबीचको आत्मीयताले तिहारलाई अझ विशेष बनाउँछ । तिहार मेरो लागि केवल एउटा चाडमात्र होइन, यो प्रेम, सद्भाव, एकता र पारिवारिक सम्बन्धलाई अझ प्रगाढ बनाउने सुन्दर अवसर हो । मेरो विचारमा तिहार आफैंमा अत्यन्त सुन्दर पर्व हो । तर, यस पर्वको मौलिकता र महत्त्व जोगाइराख्न हामी सबै सचेत हुनुपर्छ । अत्यधिक खर्च गर्ने, देखासिकी गर्ने तथा जुवा–तासमा लिप्त हुनेजस्ता विकृतिबाट टाढा रहनुपर्छ । चाडपर्व मनाउँदा आर्थिक अवस्था, सामाजिक मर्यादा र आपसी सद्भावलाई ध्यान दिनुपर्छ । तिहारको वास्तविक खुशी महँगा उपहार वा तडकभडकमा होइन, परिवारसँग बिताएका अमूल्य पल, आपसी प्रेम, आत्मीयता र अनुहारमा छाएको मुस्कानमा लुकेको हुन्छ । मौलिक संस्कृतिको संरक्षण गर्दै विसंगतिमुक्त तिहार मनाऔं : पवित्रा आचार्य, नायिकाजताततै झिलीमिली बत्तीको उज्यालो, घरआँगनमा गुञ्जिने देउसी–भैलोका मधुर स्वर, परम्परागत गीतसंगीत र आपसी हर्षोल्लासले तिहारलाई साँच्चिकै रमाइलो र अविस्मरणीय बनाउँछन् । त्यसैले तिहार मेरा लागि सबैभन्दा प्रिय पर्वहरूमध्ये एक हो । यस पर्वले मानव र पशुपक्षीबीचको प्रगाढ सम्बन्ध, प्रकृतिप्रतिको सम्मान तथा दाजुभाइ र दिदीबहिनीबीचको पवित्र स्नेह र अटुट सम्बन्धलाई जीवन्त रूपमा प्रस्तुत गर्दछ । काग, कुकुर, गाई र गोरुको पूजा गर्नुले मानव जीवनमा पशुपक्षीको महत्त्व र उनीहरूप्रतिको हाम्रो दायित्वलाई समेत स्मरण गराउँछ । तिहारको अर्को सुन्दर पक्ष देउसी–भैलो हो । यसले हाम्रो मौलिक संस्कृति, परम्परा र सांस्कृतिक पहिचानलाई संरक्षण गर्नुका साथै सामाजिक एकता, आपसी सद्भाव र सामूहिक भावनाको विकासमा महत्त्वपूर्ण योगदान पुर्‍याउँछ । यद्यपि, तिहारका केही नकारात्मक पक्ष पनि छन् । लक्ष्मीपूजाका नाममा आफ्नो धनसम्पत्ति र वैभवको अनावश्यक प्रदर्शन गर्ने प्रवृत्ति, जुवातास खेल्ने विकृति तथा मादक पदार्थको अत्यधिक सेवनले पर्वको वास्तविक महत्त्व र गरिमामाथि नै प्रश्न उठाउने गरेका छन् । यस्ता विकृति र विसंगतिलाई निरुत्साहित गर्दै पर्वलाई सभ्य, मर्यादित र संस्कृतिमैत्री बनाउनु हामी सबैको साझा दायित्व हो । यसपालिको तिहार अष्ट्रेलियामा मनाउँदै छु : मञ्जु थापा, गायिकाहाम्रो हिन्दु परम्परामा तिहार केवल एउटा पर्वमात्र होइन, यो उज्यालो, उमंग, प्रेम, सद्भाव र पारिवारिक एकताको सुन्दर संगम पनि हो । तिहार आउनासाथ चारैतिर झिलीमिली बत्तीले घर र आँगन सजिन्छन् । सेलरोटी पाकेको मीठो बासना फैलिन्छ, देउसी–भैलोको गुञ्जनले गाउँघर नै रमाइलो हुन्छ । लक्ष्मीपूजाको रौनक, दाजुभाइ तथा दिदीबहिनीबीचको प्रेम र भाइटीकाको आत्मीयताले तिहारलाई अझ विशेष बनाउँछ । विभिन्न परिकार, मीठा परिकार र आफन्तसँगको भेटघाटले यो पर्वको खुशीलाई झनै बढाउँछ । तर, यसपटकको तिहार भने म नेपालमा होइन, अष्ट्रेलियामा मनाउँदै छु । खुशीको कुरा, मेरो भाइ पनि यहीँ अष्ट्रेलियामै छन् । त्यसैले नेपालबाट टाढा भए पनि परिवारको साथ र मायाले नेपालमै तिहार मनाइरहेको अनुभूति हुनेछ । हुन त नेपालमा आफ्नै घर, आँगन, छरछिमेक र आफन्तहरूसँग मनाउँदाको जस्तो रौनक र रमाइलो यहाँ नहोला, तर पनि उपलब्ध समय र अवसरलाई भरपूर सदुपयोग गर्दै सकेसम्म तिहारलाई विशेष र अविस्मरणीय बनाउने हाम्रो योजना छ । हरेक पर्वका केही राम्रा पक्षसँगै सुधार गर्नुपर्ने पक्ष पनि हुन्छन् । तिहारजस्तो पवित्र र उज्यालो पर्वमा जुवातास खेल्ने, अत्यधिक मदिरापान गर्नेजस्ता गतिविधिले यसको वास्तविक सौन्दर्य र महत्त्वलाई ओझेलमा पार्न सक्छन् । यस्ता विकृतिबाट टाढा रहेर आपसी प्रेम, सद्भाव, संस्कार र पारिवारिक सम्बन्धलाई प्राथमिकता दिन सकियो भने तिहारको खुशी अझ अर्थपूर्ण बन्नेछ । साधना कला केन्द्रको तर्फबाट हामी दुई दिनसम्म देउसी-भैलो खेल्दै छौ : मिलन मोक्तान, गीतकारनेपाली कला, संस्कृति र मौलिक परम्पराको संरक्षण, प्रवर्द्धन तथा प्रचारप्रसार गर्ने उद्देश्यले विभिन्न स्थानमा मौलिक लोकनृत्यसहित देउसी–भैलो कार्यक्रम प्रस्तुत गर्ने अवसर प्राप्त भएको छ । यसै क्रममा साधना कला केन्द्रको तर्फबाट हामी दुई दिनसम्म देउसी–भैलो खेल्दै नेपाली मौलिक कला र संस्कृतिको सुन्दरता प्रस्तुत गर्दैछौं । तिहार मेरो सबैभन्दा प्रिय र मन पर्ने पर्व हो । तिहार आउनासाथ मन बाल्यकालका ती रमाइला दिनहरूमा पुग्छ, जहाँ खुशी किन्न धेरै पैसा चाहिँदैनथ्यो, न त रमाउन कुनै ठूलो बहाना नै ! दशैँमा नयाँ किनेको जुत्ता तिहारमा देउसी खेल्दाखेल्दै सोलै दुलो पर्ने गरी घोटिन्थ्यो । घरघरमा देउसी खेल्दै हिँड्दा जुत्ताको हालत यस्तो हुन्थ्यो कि घर फर्किएपछि बाबाको गाली पनि उत्तिकै खानुपर्थ्यो । तर, आज सम्झिँदा बाबाको त्यो गालीमा पनि कति माया लुकेको रहेछ भन्ने महसुस हुन्छ । ती दिन, ती साथीभाइ, त्यो रमाइलो र बाबाको गाली- सबै तिहारका अमूल्य र कहिल्यै नमेटिने मीठा सम्झना बनेर मनमा बसेका छन् । समय बदलियो, उमेर बढ्यो, तर तिहारप्रतिको मोह र देउसी–भैलोप्रतिको आत्मीयता आज पनि उस्तै छ । फरक यतिमात्रै हो, हिजो हामी रमाइलोका लागि देउसी खेल्थ्यौं, आज आफ्नो मौलिक कला, संस्कृति र परम्परालाई नयाँ पुस्तामाझ चिनाउने र जीवन्त राख्ने उद्देश्यले देउसी–भैलोमा जोडिएका छौं । संस्कृति हाम्रो पहिचान हो, परम्परा हाम्रो गौरव हो र यसको संरक्षण गर्नु हामी सबैको दायित्व हो । म्हः पूजा र न्हूदँया भिन्तुना विशेष आकर्षण : गोपालकाजी कायस्थ, वरिष्ठ उपाध्यक्ष, नेपाल चलचित्र संघतिहार मेरो मनको सबैभन्दा प्रिय पर्व । तिहार मलाई सबैभन्दा बढी मन पर्ने पर्व हो । यस पर्वसँग मेरा अनेकौं सुन्दर सम्झना, आत्मीय भावना र गहिरो सांस्कृतिक सम्बन्ध जोडिएका छन् । विशेषगरी, हाम्रो मौलिक परम्पराअनुसार मनाइने म्हः पूजा र नयाँ वर्षको शुभारम्भसँगै मनाइने न्हूदँया भिन्तुना यस पर्वका विशेष आकर्षण हुन् । वर्षमा एकपटक आफ्नै शरीर, आत्मा र अस्तित्वलाई सम्मान गर्दै आफैंलाई पूजा गर्ने हाम्रो मौलिक परम्परा म्हः पूजाले हामीलाई आत्मसम्मान, आत्मशुद्धि र आफ्नो अस्तित्वको महŒवबोध गराउँछ । संसारमै विरलै पाइने यस्तो सुन्दर सांस्कृतिक परम्पराको हिस्सा हुन पाउनु आफैंमा गौरवको विषय हो । त्यसैगरी, न्हूदँया भिन्तुनामार्फत नयाँ वर्षको स्वागत गर्दै सुख, शान्ति, समृद्धि र नयाँ आशाका साथ जीवनलाई अघि बढाउने उत्साह प्राप्त हुन्छ । बाल्यकालमा तिहारको रौनक नै बेग्लै हुन्थ्यो । घरआँगनको सरसफाइ, झिलीमिली बत्ती, देउसी–भैलो, सेलरोटीको सुगन्ध, आफन्तसँगको भेटघाट र चाडपर्वको उमंगले मन त्यसै रमाउँथ्यो । समय बदलिएको छ, उमेर बढेको छ, जिम्मेवारीहरू थपिएका छन्, तर तिहारप्रतिको मोह र यसले दिने खुशीमा कुनै कमी आएको छैन । आज पनि तिहार आउँदा मनमा उही उत्साह, उही उमंग र उही बाल्यकालीन खुशी सञ्चारित हुन्छ । मेरो विचारमा, तिहार केवल एउटा चाड होइन, प्रकृति, संस्कृति, सम्बन्ध र आत्मसम्मानको सुन्दर संगम हो । यो प्रकृति र जीवजन्तुप्रतिको सम्मान प्रकट गर्ने पर्व हो । दाजुभाइ तथा दिदीबहिनीबीचको प्रेम, सद्भाव र आत्मीयता प्रगाढ बनाउने पर्व हो । देउसी-भैलो, गीतसंगीत र नाचगानमार्फत सांस्कृतिक मनोरञ्जन र सामाजिक एकता अभिव्यक्त गर्ने पर्व हो । यसैले तिहार मेरा लागि उज्यालोको मात्र होइन, आत्मीयता, अपनत्व, पहिचान, परम्परा र जीवनप्रतिको उत्साहको पर्व हो ।तिहारले हरेक वर्ष मनमा नयाँ उमंग, जीवनमा नयाँ ऊर्जा र सम्बन्धहरूमा थप आत्मीयता भरिदिन्छ । सायद त्यसैले तिहार मलाई सबैभन्दा प्रिय लाग्छ । सम्पूर्णमा न्हूदँया भिन्तुना र तिहारको हार्दिक मंगलमय शुभकामना ! विभिन्न सांगीतिक कार्यक्रममा सरिक हुनेछु : सारिका घिमिरे गायिका/नायिकायो तिहारमा पनि म विभिन्न सांगीतिक कार्यक्रममा सरिक हुनेछु । तिहार उज्यालो, खुशी, उमंग र आत्मीयताको अनुपम पर्व हो । मलाई सबैभन्दा मन पर्ने चाडपर्वमध्ये तिहार पनि एक हो । फूलहरूको सुगन्ध, झिलीमिली बत्तीको चमक, देउसी–भैलोको गुञ्जन र घरआँगनमा छाउने उत्साहले तिहारलाई अझ विशेष बनाउँछ । विगतका वर्षहरूमा जस्तै यसपालि पनि हर्षोल्लासका साथ तिहार मनाउने सोच बनाएको छु । कागदेखि दाजुभाइसम्मको पूजा गरिने भएकाले पनि तिहार अन्य पर्वभन्दा केही फरक र विशेष लाग्छ । यस पर्वले मानिसमात्र होइन, प्रकृति र विभिन्न जीवजन्तुप्रतिको सम्मान, प्रेम र सद्भावको सन्देश पनि दिन्छ । देउसी-भैलो खेल्ने, अरूले खेलेको हेरेर रमाउने, देउसी-भैलो टोलीलाई दक्षिणा दिने, घरमा मीठा परिकार बनाउने र परिवारसँग रमाइलो गर्दै समय बिताउने नै पनि यस वर्षको मेरो तिहार योजना छ । विशेषगरी तिहारमा पाक्ने सेलरोटीको त आफ्नै छुट्टै महत्व र स्वाद छ । मलाई आफैं सेलरोटी पकाउन निकै मन पर्छ । परिवारसँगै बसेर सेलरोटी पकाउनु, खानु र रमाइलो गर्नु तिहारको छुट्टै आनन्द हो । परिवारका सदस्यहरूसँग हर्षोल्लासका साथ मनाउँदै छु : शीला गजुरेल, मोडल/कलाकारउज्यालो, उमंग, खुशी र आपसी प्रेमको अनुपम पर्व तिहार यसवर्ष आफ्नै परिवारका सदस्यहरूसँग हर्षोल्लासका साथ मनाउँदै छु । भाइटीकाको यस पवित्र अवसरमा प्यारो भाइलाई सप्तरंगी टीका र मखमली फूलको माला पहिरिएर यो सुन्दर पर्व मनाउने सोचले मन हर्ष र आत्मीयताले भरिएको छ । दिदीबहिनी तथा दाजुभाइबीचको निःस्वार्थ माया, अटुट विश्वास, सद्भाव र आत्मीयताको प्रतीक यस पर्वले हरेक सम्बन्धलाई अझ प्रगाढ बनाउँदै सबैको जीवनमा सुख, शान्ति, समृद्धि, सुस्वास्थ्य र सफलताका नयाँ किरण छरिदियोस् । देश तथा विदेशमा रहनुभएका सम्पूर्ण नेपाली दाजुभाइ, दिदीबहिनी, आफन्तजन तथा शुभेच्छुकहरूमा तिहार एवं भाइटीकाको हार्दिक मंगलमय शुभकामना व्यक्त गर्दछु । सबैका घरआँगनमा दीपावलीको उज्यालो छाओस्, हरेक मुहारमा मुस्कान छाओस् र हरेक मनमा प्रेम, सद्भाव तथा खुशीको सञ्चार भइरहोस् भन्ने कामना गर्दछु ।