काठमाडौं । नेपाल प्रहरीले आधारभूत तहका कर्मचारीका समस्या, पिरमर्का र गुनासो सुन्न तथा सम्बोधन गर्न आठ सदस्यीय टोली गठन गरेको छ। प्रहरी कार्यालय सहयोगीदेखि वरिष्ठ हवल्दारसम्मका कर्मचारीका गुनासो व्यवस्थापन गर्न प्रहरी प्रधान कार्यालयले छुट्टै टोली बनाएको हो। अपराध अनुसन्धान विभागका प्रहरी उपरीक्षक (एसपी) गोविन्द पुरीको नेतृत्वमा गठित टोलीमा आठ जना प्रहरी कर्मचारी छन्। प्रहरी महानिरीक्षक डा. मनोजकुमार केसीले हस्ताक्षर गरी टोलीका सदस्यलाई जिम्मेवारी तोकिएको पत्रसमेत दिएका छन्। टोलीमा एसपी पुरीसँगै कार्य विभागका प्रहरी नायब उपरीक्षक (डीएसपी) कृष्णराज ओझा, कर्मचारी प्रशासन शाखाका प्रहरी निरीक्षक प्रकाश थापा, सुरक्षा सेवा व्यवस्था महाशाखाका प्रहरी निरीक्षक सञ्जिता श्रेष्ठ, कल्याण महाशाखाका वरिष्ठ प्रहरी नायब निरीक्षक शान्तालक्ष्मी बलामी, अपराध अनुसन्धान विभागका प्रहरी सहायक निरीक्षक धर्मी यादव, सञ्चार निर्देशनालयका प्रहरी सहायक हवल्दार हरिबहादुर देउजा र विशेष कार्यदलका प्रहरी जवान विष्णु घिमिरे रहेका छन्। टोलीलाई आधारभूत तहका प्रहरी कर्मचारीका समस्या तथा गुनासो सुन्ने, अभिलेखीकरण गर्ने र प्राप्त गुनासो सम्बोधनका लागि सम्बन्धित कार्यालयसँग आवश्यक समन्वय गर्ने जिम्मेवारी दिइएको छ। प्रहरी प्रधान कार्यालयका अनुसार कर्मचारीका गुनासालाई समयमै सम्बोधन तथा व्यवस्थापन गर्ने उद्देश्यले टोली गठन गरिएको हो।
तल्लो तहका प्रहरी कर्मचारीको गुनासो सुन्न प्रहरी प्रधान कार्यालयले बनायो टोली

Read Complete Original Article
Published originally on केन्द्रबिन्दु






