जनकपुरको दास्रो जित, पोखराको लगातार हार

काठमाडौं । नेपाल प्रिमियर लिग (एनपिएल) अन्तर्गत जनकपुर बोल्ट्सले पोखरा एभेन्जर्सलाई ९ रनले पराजित गरेको छ । कीर्तिपुरस्थित त्रिवि क्रिकेट मैदानमा आइतबार भएको प्रतिस्पर्धात्मक खेलमा जनकपुरले दिएको १४८ रनको लक्ष्य पछ्याएको पोखरा निर्धारित २० ओभरमा ९ विकेट गुमाउँदै १३८ रनमा समेटियो । यससँगै जनकपुरले रोमाञ्चक जित दर्ता गरेको छ । १४८ रनको लक्ष्य पछ्याउन मैदानमा उत्रिएको पोखराले सुरुवातदेखि नै दबाब महसुस गरेको थियो । नियमित अन्तरालमा विकेट गुमाउँदा टोली लक्ष्यसम्म पुग्न असफल भयो । पोखराका कप्तान कुशल भुर्तेलले सर्वाधिक ३५ रन बनाए पनि उहाँको प्रयास टोलीलाई जित दिलाउन पर्याप्त हुन सकेन । उहाँले २४ बलको सामना गर्दै पाँच चौका प्रहार गर्नुभयो । त्यस्तै, विपिन आचार्यले २० रनको योगदान दिनुभयो । किरण ठगुन्नाले आक्रामक ब्याटिङ गर्दै केवल पाँच बलमा १५ रन जोड्नुभयो । तर, अन्य ब्याटरले अपेक्षाकृत प्रदर्शन गर्न नसक्दा पोखरा लक्ष्यभन्दा ९ रन पछाडि रहन पुग्यो । पोखराका शाकिब अल हसनले ९, मेहेदी हसनले ८, अर्जुन घर्तीले ७, चामिका करुणारत्नेले ४ र दिनेश खरेलले ३ रन बनाउनुभयो । मोहम्मद सैफुद्दिन भने खाता नै नखोली आउट हुनुभयो । पोखराको ब्याटिङ लाइनअप ध्वस्त पार्न जनकपुरका मोइन अलीले महत्त्वपूर्ण भूमिका निर्वाह गर्नुभयो । उहाँले कसिलो बलिङ गर्दै चार ओभरमा मात्र १३ रन खर्चेर तीन विकेट लिनुभयो । हरमित सिंह र सैफ हसनले दुई–दुई विकेट हात पार्नुभयो । त्यस्तै, ललित राजवंशी र जेम्स नीशमले एक-एक विकेट लिनुभयो । यसअघि टस हारेर पहिले ब्याटिङ गरेको जनकपुर बोल्ट्सले निर्धारित २० ओभरमा सात विकेट गुमाएर १४७ रन बनाएको थियो । जनकपुरका लागि तृतराज दासले उत्कृष्ट ब्याटिङ गर्दै सर्वाधिक ६१ रन बनानुभयो । उहाँले ५५ बलको सामना गर्दै सात चौका र दुई छक्का प्रहार गर्नुभयो । उहाँको धैर्यपूर्ण ब्याटिङले जनकपुरलाई प्रतिस्पर्धात्मक योगफलसम्म पुर्‍याउन महत्त्वपूर्ण योगदान गर्‍यो । जनकपुरका मोइन अलीले पनि आक्रामक ब्याटिङ गर्दै १६ बलमा २१ रन जोड्नुभयो । त्यस्तै, अभिषेक तिवारीले अन्तिमतिर आक्रामक शैली अपनाउँदै अविजित २४ रन बनाउनुभयो । उहाँले केवल पाँच बलको सामना गर्दै एक चौका र दुई छक्का प्रहार गर्नुभयो । जेम्स नीशमले ११ रनको योगदान दिनुभयो । तर, जनकपुरका अन्य ब्याटरले भने उल्लेखनीय प्रदर्शन गर्न सकेनन् । कप्तान हरमित सिंह र अनिल साहले समान नौ रन बनाउँदा सैफ हसन एक रनमा आउट हुनुभयो । अन्य ब्याटरले पनि ठूलो साझेदारी गर्न नसक्दा जनकपुर १४७ रनमा सीमित भएको थियो । पोखराका लागि शाकिब अल हसनले उत्कृष्ट बलिङ प्रदर्शन गर्नुभयो । उहाँले तीन ओभरमा मात्र चार रन खर्चेर तीन विकेट लिनुभयो । उहाँको किफायती बलिङले जनकपुरको रनगति नियन्त्रणमा राख्न महत्त्वपूर्ण भूमिका खेलेको थियो । मेहेदी हसन र मोहम्मद सैफुद्दिनले पनि एक-एक विकेट लिनुभयो । जनकपुरले बनाएको १४७ रनको योगफल ठूलो देखिएको थिएन । तर, बलरहरूको अनुशासित प्रदर्शन र मोइन अलीको प्रभावकारी बलिङका कारण पोखरालाई लक्ष्य भेट्टाउन कठिन भयो । विशेषगरी अन्तिम ओभरसम्म कायम रहेको प्रतिस्पर्धाले खेललाई रोमाञ्चक बनाएको थियो । यस जितसँगै जनकपुर बोल्ट्सले एनपिएलमा महत्त्वपूर्ण सफलता हात पारेको छ भने पोखरा एभेन्जर्सले जितको अवसर गुमाएको छ । यसअघिको खेलमा पोखरा सुदूरपश्चिमसँग ६ विकेटले पराजित भएको थियो भने जनकपुर पहिलो खेलमा कर्णाली याक्ससँग १९ रनले पराजित हुँदा दोस्रो खेलमा भने काठमाण्डु गोर्खाजलाई ८ विकेटले हराएको थियो । जारी प्रतियोगितामा जनकपुरले तीन खेलबाट चार अंक बनाएको छ । पोखरा भने जितविहीन छ ।