चितवनमाथि सुदूरपश्चिमको सहज जित

काठमाडौं । नेपाल प्रिमियर लिग (एनपिएल) अन्तर्गत सोमबारको दोस्रो खेलमा सुदूरपश्चिम रोएल्सले चितवन राइनोजलाई ५ विकेटले पराजित गरेको छ । चितवनले दिएको १३० रनको लक्ष्य सुदूरपश्चिम रोएल्सले १६.४ ओभरमा ५ विकेट गुमाएर १३१ रन बनाउँदै पूरा गरेको हो । सुदूरपश्चिमले दोस्रो जितपछि चार खेलबाट चार अंक जोडेको छ । चितवनको भने यो पहिलो हार हो । पहिलो खेलमा विराटनगर किंग्सलाई हराएको चितवनले दोस्रो खेल वर्षाले रद्द हुँदा लुम्बिनी लायन्ससँग एक-एक अंक बाँडेको थियो । चितवनको तीन खेलबाट तीन अंक छ । चितवनको हारपछि अब साविक विजेता लुम्बिनी मात्र तेस्रो संस्करणमा एक मात्र अपराजित टिमको रुपमा छ । सुदूरपश्चिमका लागि ब्रान्डन म्याकमुलेनले २१ बल खेल्दै ६ चौका र २ छक्का मदतमा सर्वाधिक ४३ रन बनाउनुभयो । इशान पान्डेले २९ बलमा २ चौका प्रहार गर्दै २५ रन जोड्नुभयो । ३ रनमै पहिलो विकेट गुमाएको सुदूरपश्चिमका लागि म्याकमुलेनले विनोद भण्डारीसँग दोस्रो विकेटका लागि ३१ रनको साझेदारी गर्नुभएको थियो । विनोद ११ रन बनाएर आउट हुनुभयो । त्यसपछि म्याकमुलेनले इशानसँग तेस्रो विकेटका लागि ३६ रनको साझेदारी गर्नुभयो । म्याकमुलेन र कप्तान दीपेन्द्र सिंह लगातार आउट हुँदा सुदूरपश्चिम ७०-४ को स्थितीमा पुगेको थियो । तर, आरिफ शेख र इशान पाण्डेले पाँचौ विकेटको लागि ३३ रनको साझेदारी गर्दै इनिङ्स सम्हाल्नुभयो । इशान आउट भएपछि आरिफले शेरफान रथरफोर्डसँग मिलेर सुदूरपश्चिमलाई जितसम्म पुर्‍याउनुभयो । रथरफोर्डले १५ बल खेल्दै २ चौका र १ छक्का मदतमा अविजित २१ रन बनाउनुभयो । आरिफले २६ बलमा अविजित २० रन जोड्नुभयो । बलिङमा चितवनका लागि रञ्जित कुमारले ४ ओभरमा २८ रन खर्चेर ३ विकेट लिनुभयो । रिजन ढकाल र मौसम ढकालले १-१ विकेट लिनुभयो । त्यसअघि कीर्तिपुरस्थित टीयू मैदानमा टस हारेर पहिले ब्याटिङ गरेको चितवनले रवि बोपाराको ४९ रन मदतमा २० ओभरमा ६ विकेट गुमाएर १२९ रन बनाएको हो । चितवनका लागि रवि बोपारले सर्वाधिक ४९ रन बनाउनुभयो । चौथो नम्बरमा ब्याटिङ गर्नुभए बोपाराले ४० बलमा ३ चौका र २ छक्का मदतमा ४९ रन बनाएर आउट हुनुभयो । अर्धशतकका लागि १ रन आवश्यक भएका बेला ठूलो सट प्रहार गर्ने चक्करमा बोपारा आउट हुनुभयो । २७ रनमा २ विकेट गुमाएको अवस्थामा चितवनका लागि रवि बोपारा र डाविड मालानले ३५ रनको साझेदारी गर्नुभएको थियो । यस्तै बोपाराले चौथो विकेटका लागि कप्तान सिकन्दर राजासँग ३२ रनको साझेदारी गर्नुभएको थियो । डाविड मालानले १६ तथा अर्जुन साउद र कप्तान सिकन्दर राजाले समान १५ रन रन बनाउनुभयो । टम टेलर ६ रनमा अविजित रहनुभयो । सुदूरपश्चिमका लागि स्कट कुगेलेइनले २ तथा हेमन्त धामी, कप्तान दीपेन्द्र सिंह ऐरी र अनिल खरेलले १–१ विकेट लिनुभयो । एनपिएलमा आज (मंगलबार) पनि दुई खेल हुनेछ । पहिलो खेल विराटनगर किंग्स र जनकपुर बोल्ट्स तथा दोस्रो खेल लुम्बिनी लायन्स र पोखरा एभेन्जर्सबीच हुनेछ । करण र रासिदको साझेदारीमा काठमाडौं गोर्खाजको पहिलो जितयसैबीच, सोमबार भएको एनपिएलको पहिलो खेलमा कर्णाली याक्सलाई चार विकेटले पराजित गर्दै काठमाडौं गोर्खाजले प्रतियोगितामा पहिलो जित निकालेको छ । कीर्तिपुरस्थित त्रिवि क्रिकेट मैदानमा सोमबार भएको खेलमा कर्णालीले दिएको १८१ रनको लक्ष्य काठमाडौंले १९.४ ओभरमा ६ विकेट गुमाएर पूरा गरेको थियो । लगातार दुई खेल जित्दै प्रतियोगितामा उत्कृष्ट सुरुआत गरेको कर्णालीले काठमाडौंसँग पराजित भएसँगै पहिलो हार व्यहोरेको छ । पहिलो खेलमा पराजित भएको काठमाडौंले भने जितको खाता खोलेको हो । टस हारेर पहिले ब्याटिङ गरेको कर्णाली याक्सले निर्धारित २० ओभरमा ६ विकेट गुमाउँदै १८० रन बनाएको थियो । कर्णालीका लागि ओपनर आरिफूल इस्लामले सर्वाधिक ४४ रन बनाउनुभयो । उहाँले २२ बलमा पाँच चौका र तीन छक्का प्रहार गर्नुभयो । कर्णालीले पावरप्लेमा आक्रामक ब्याटिङ गर्दै एक विकेटको क्षतिमा ६५ रन जोडेको थियो । तर, मध्यक्रममा रनगति केही सुस्त बनेको थियो । हुसैन तलातले ४० रन बनाउनुभयो । उहाँले पवन सर्राफसँग पाँचौँ विकेटका लागि ६५ रनको साझेदारी गर्नुभयो । पवनले २४ बलमा दुई छक्कासहित अविजित ३० रन बनाउनुभयो ।गुल्सन झाले २० रन जोड्दा मार्क वाटले १७ तथा दीपकप्रसाद डुम्रेले आठ रन बनाउनुभयो । सोमपाल कामी एक रनमा अविजित रहनुभयो । काठमाडौंका लागि करण केसीले दुई विकेट लिनुभयो भने साहब आलम, देव शाह, जहानदाद खान र सन्तोष यादवले समान एक विकेट लिनुभयो । १८१ रनको लक्ष्य पछ्याएको काठमाडौंको सुरुआत भने अपेक्षाअनुसार हुन सकेन । ओपनर डेविड वार्नरले १६ र स्मिथ पटेलले नौ रन मात्रै बनाउन सक्नुभयो । मोहम्मद आदिल आलमले २० रन जोड्दा टोली दबाबमा थियो । तर, पाँचौँ विकेटका लागि रासिद खान र कप्तान करण केसीबीच भएको ५५ रनको महत्त्वपूर्ण साझेदारीले काठमाडौंलाई जितको बाटोमा फर्कायो । रासिदले आक्रामक अर्धशतकीय पारी खेल्दै ३३ बलमा तीन चौका र दुई छक्कासहित ५० रन बनाउनुभयो । कप्तान करण केसीले पनि विस्फोटक ब्याटिङ गर्दै २० बलमा चार चौका र तीन छक्काको मद्दतमा ४४ रन जोडनुभयो । यी दुईको उत्कृष्ट ब्याटिङले काठमाडौंलाई लक्ष्य नजिक पुर्‍याएको थियो । जहानदाद खानले २२ रन बनाउनुभयो भने सन्तोष यादव पाँच रनमा अविजित रहनुभयो । कर्णालीका लागि सोमपाल कामी र हुसैन तलातले समान दुई विकेट लिनुभएको थियो भने मार्क वाट र नन्दन यादवले एक–एक विकेट हात पार्नुभयो । यसअघि कर्णालीले पहिलो खेलमा जनकपुर बोल्ट्सलाई १९ रनले र दोस्रो खेलमा विराटनगर किंग्सलाई चार विकेटले पराजित गरेको थियो । काठमाडौं भने पहिलो खेलमा जनकपुर बोल्ट्ससँग आठ विकेटले पराजित भएको थियो ।