काठमाडौं । भारतको सिक्किम र नेपालको पूर्वी भेगको सांगीतिक यात्रा सकेर फर्किएको लोकप्रिय लोकरक ब्याण्ड नेपथ्यले पुनः नेपाल यात्राको तयारी गरेको छ । यसपटक ब्याण्डले ठूला सहरभन्दा ग्रामीण बस्ती र मझौला सहरलाई आफ्नो सांगीतिक गन्तव्य बनाउने भएको छ । नेपालयले जारी गरेको प्रेस नोट अनुसार नेपथ्यले चितवनको सौराहा, स्याङ्जाको पुतलीबजार, म्याग्दीको बेनी र तनहुँको बेलचौतारामा सांगीतिक प्रस्तुति दिनेछ । यात्राको पहिलो कन्सर्ट यही मंसिर ३ गते बिहीबार चितवनको पर्यटकीय बस्ती सौराहामा हुनेछ । सिसुवार मैदान (सभागृहअगाडि) मा आयोजना हुने कन्सर्टका लागि सहुलियत दरका टिकट यसअघि नै बिक्री भइसकेका छन् । अन्य टिकटसमेत सीमित संख्यामा मात्र बाँकी रहेको आयोजकले जनाएको छ । त्यसपछि ब्याण्ड मंसिर ५ गते शनिबार स्याङ्जाको पुतलीबजार पुग्नेछ । त्यहाँस्थित मालेबगर खेलमैदानमा नेपथ्यले आफ्ना चर्चित लोकरक गीत प्रस्तुत गर्नेछ । तेस्रो प्रस्तुति म्याग्दीको बेनीमा हुनेछ । धौलागिरि हिमालको काखमा रहेको बेनीस्थित खुलामञ्चमा मंसिर ९ गते ब्याण्डले सांगीतिक प्रस्तुति दिने कार्यक्रम छ । यात्राको अन्तिम कन्सर्ट भने मंसिर १२ गते शनिबार तनहुँको बेलचौतारामा आयोजना हुनेछ । शुक्लागण्डकी नगरपालिकास्थित भानुभक्त क्याम्पसको मैदानमा हुने उक्त कार्यक्रमसँगै नेपथ्यको यस चरणको सांगीतिक यात्रा सम्पन्न हुनेछ । देशभित्र र विदेशका ठूला सहरमा भव्य सांगीतिक कार्यक्रम गर्दै आएको नेपथ्यले साना शहर तथा ग्रामीण बस्तीमा रहेका आफ्ना दर्शकको चाहनालाई पनि प्राथमिकतामा राख्दै आएको छ । यसपटकको यात्राले पनि संगीतलाई ठूला शहरमा मात्र सीमित नराखी देशका विभिन्न भूगोल र समुदायसम्म पुर्याउने ब्याण्डको प्रयासलाई प्रतिबिम्बित गर्नेछ । यस यात्राका लागि तय गरिएका चार गन्तव्यमध्ये म्याग्दीको बेनीमा नेपथ्य यसअघि पनि पुगिसकेको छ । सौराहा, पुतलीबजार र बेलचौतारामा भने ब्याण्ड पहिलोपटक प्रस्तुत हुन लागेको हो ।
ग्रामीण बस्ती र मझौला शहरमा नेपथ्यको सांगीतिक यात्रा

Read Complete Original Article
Published originally on हिमालय टाइम्स






