गोलकिपरसँग मैदानमै ठोक्किएका फुटबलर मिगेलको निधन

काठमाडौं । स्पेनिस दोस्रो डिभिजनको खेलका क्रममा विपक्षी टोलीका गोलकिपरसँग मैदानमै ठोक्किएर घाइते भएका टेनेरिफका फरवार्ड जिसस डे मिगेलको निधन भएको छ । ३० वर्षीय डे मिगेलको निधन भएको उनको क्लबले मंगलबार पुष्टि गरेको हो । सोमबार टेनेरिफको घरेलु मैदान एस्टाडियो हेलियोडोरो रोड्रिगेज लोपेजमा टेनेरिफ र एन्डोराबीच खेल भइरहेको थियो । खेल २–२ को बराबरीमा रहेको अवस्थामा निर्धारित समयपछि थपिएको सातौँ मिनेटमा दुर्घटना भएको थियो । खेलको ५९औँ मिनेटमा मैदान प्रवेश गरेका डे मिगेलको टोली त्यसबेला २–० ले अगाडि थियो । तर खेलको अन्तिम समयमा टेनेरिफको पेनाल्टी क्षेत्रबाट क्लियर गरिएको बल मध्यभागतर्फ पुगेपछि त्यसलाई नियन्त्रणमा लिन खोज्दा उनी एन्डोराका गोलकिपर जिसस ओवोनोसँग ठोक्किएका थिए । उक्त क्रममा ओवोनोको घुँडा डे मिगेलको छातीमा लागेको थियो । घटनालगत्तै रेफ्रीले गोलकिपरलाई रातो कार्ड देखाएका थिए । मैदानमा ढलेका डे मिगेलको उपचारका लागि खेलाडीहरूले तत्कालै मेडिकल टोलीलाई बोलाएका थिए । घटनापछि खेल केही समयमै स्थगित गरिएको थियो । मैदानमा रहेका खेलाडीहरू भावुक हुँदै रोएका थिए । स्पेनिस सञ्चारमाध्यमका अनुसार अस्पताल लैजाने क्रममा एम्बुलेन्समै डे मिगेललाई हृदयाघात भएको थियो । उनलाई सान्ता क्रुजस्थित नुएस्ट्रा सेनोरा डे क्यान्डेलेरिया विश्वविद्यालय अस्पतालको सघन उपचार कक्षमा भर्ना गरिएको थियो । उनको निधनपछि क्लबले मंगलबार बिहान शोक वक्तव्य जारी गर्दै भनेको छ, ‘हामी पीडाले विक्षिप्त भएका छौँ । घाँटीमा गाँठो परेको छ र यो सत्य हो भन्ने विश्वास गर्न सकिरहेका छैनौँ । जिसस डे मिगेल अलामेडाको दुःखद निधनको खबर सार्वजनिक गर्नुपर्दा हामी अत्यन्त मर्माहत छौँ ।’ क्लबले थप भनेको छ, ‘सान्त्वना दिने कुनै शब्द छैन । यो असह्य पीडा कम गर्ने कुनै उपाय पनि छैन । हामी शोकसन्तप्त परिवार, उनका प्रियजन र आज यो दुःखद घटनाबाट शोकमा डुबेको टेनेरिफका सम्पूर्ण नागरिकसँगै छौँ ।’ क्लबका अनुसार डे मिगेलको परिवारले प्राप्त सहयोग र समवेदनाप्रति आभार व्यक्त गर्दै यस कठिन समयमा आफ्नो गोपनीयताको सम्मान गर्न आग्रह गरेको छ । सन् २०१५ मा लेगानेस बीबाट व्यावसायिक फुटबल यात्रा सुरु गरेका म्याड्रिडमा जन्मिएका डे मिगेलले स्पेनका आठ अन्य क्लबबाट पनि खेलेका थिए । सन् २०२३–२४ को सिजनमा १६ गोल गर्दै आफ्नो टोलीलाई दोस्रो डिभिजनमा बढुवा गराउन महत्त्वपूर्ण योगदान दिएका उनले सन् २०२४ अगस्टमा कास्टेयोनबाट व्यावसायिक फुटबलमा डेब्यु गरेका थिए । त्यसपछि सन् २०२५ मा तीन वर्षको सम्झौतासहित टेनेरिफमा आबद्ध भएका थिए ।