खुशी र पीडाको मिश्रणमा ‘चिरञ्जीवी भवः’को पोष्टर

काठमाडौं । दीपकप्रसाद आचार्य ‘काकु’को निर्देशनमा निर्माण भइरहेको चलचित्र ‘चिरञ्जीवी भवः’का दुई पोष्टर सार्वजनिक भएका छन् । निर्माण टिमले चलचित्रका मुख्य कलाकार हरिवंश आचार्य, आशीर्वाद क्षेत्री र प्रशंसा रायमाझीलाई समेटेर पोष्टर सार्वजनिक गरेको हो । सार्वजनिक पोष्टरमा हरिवंशलाई गम्भीर र रवाफिलो पारिवारिक अभिभावकको भूमिकामा प्रस्तुत गरिएको छ । अर्को पोष्टरमा उहाँ आशीर्वादलाई आशीर्वाद दिइरहेको देखिनुभएको छ । यसबाट चलचित्रमा हरिवंश र आशीर्वाद बुबा-छोराको भूमिकामा रहेको अनुमान गरिएको छ । चलचित्रमा हरिवंश ‘चिरञ्जीवी बाजे’को चरित्रमा देखिनुहुनेछ । सोसल ड्रामा विधाको चलचित्रले दुई पुस्ताबीचको वैचारिक भिन्नता र पारिवारिक सम्बन्धको कथालाई प्रस्तुत गर्नेछ । कुमार कट्टेल ‘जिग्री ब्रो’को कथामा दीपक आचार्यले चलचित्र निर्माण गर्नुभएको हो । जिग्री इन्टरटेनमेन्ट र प्रिमियर प्रोडक्सनको प्रस्तुतिमा बनेको चलचित्र पोष्ट प्रोडक्सनमा छ । चलचित्रमा हरिवंश, आशीर्वाद र प्रशंसासँगै करिश्मा मानन्धर, मिश्री थापा, कमलमणि नेपाल, अभय बराल, सुमन कार्की, सुवर्ण थापा, तुलसी घिमिरे, सरोज अर्याल, हरिस निरौलालगायत कलाकारको अभिनय छ । गतवर्ष ‘परान’मार्फत व्यावसायिक सफलता हासिल गर्नुभएका निर्देशक आचार्यको यो दोस्रो चलचित्र हो । चलचित्र माघ १ गते (१५ जनवरी)देखि देशभरका हलमा प्रदर्शनमा आउने निर्माण टिमले जनाएको छ ।