काठमाडौं । कुशल भुर्तेलको अलराउन्ड प्रदर्शन र कप्तान सन्दीप लामिछानेको उत्कृष्ट बलिङको मद्दतमा नेपालले कतारमा जारी राइजिङ स्टार्स एसिया कपमा पहिलो जित दर्ता गरेको छ । आइतबार भएको खेलमा नेपालले युएईलाई ६ विकेटले पराजित गरेको हो । युएईले दिएको १२२ रनको सामान्य लक्ष्य नेपालले २२ ओभरमा चार विकेट गुमाएर पूरा गर्यो । नेपालको जितमा कुशल भुर्तेलले ब्याटिङ र बलिङ दुवैमा प्रभावशाली प्रदर्शन गर्नुभयो । उहाँले ५६ बलमा ६ चौका र एक छक्काको मद्दतमा सर्वाधिक ५७ रन बनाउनुभयो । मयन यादवले २७ तथा बसिर अहमदले अविजित १८ रनको योगदान दिनुभयो । युएईका मुहम्मद मोहसिनले दुई विकेट लिनुभयो भने उदीस सुरी र अंश टण्डनले एक-एक विकेट हात पार्नुभयो । यसअघि टस हारेर पहिले ब्याटिङ गरेको युएईले ३९.५ ओभरमा सबै विकेट गुमाएर १२१ रन बनाएको थियो । उसका लागि मोहम्मद शाहदादले सर्वाधिक ४० रन बनाउँदा हरप्रीत सिंह भाटियाले ३२ र नूर उल्लाह अयोबीले १२ रन बनाउनुभएको थियो । अन्य ब्याटरले दोहोरो अंकमा रन जोड्न सकेनन् । युएईको इनिङ्स ध्वस्त पार्नेक्रममा नेपाली कप्तान सन्दीप लामिछानेले उत्कृष्ट बलिङ गर्नुभयो । उहाँले १० ओभरमा तीन मेडन राख्दै मात्र ११ रन खर्चिएर तीन विकेट लिनुभयो । कुशल भुर्तेलले पनि तीन विकेट हात पार्नुभयो । यस्तै, नन्दन यादव, रासिद खान र ललित राजवंशीले एक–एक विकेट लिनुभएको थियो । प्रतियोगिताको पहिलो खेलमा भारत ‘ए’सँग ३०६ रनको फराकिलो हार बेहोरेको नेपालले दोस्रो खेलमा भने प्रभावशाली पुनरागमन गरेको हो । पहिलो खेलमा नेपाल २६ रनमै समेटिएको थियो । नेपालले अब प्रतियोगिताअन्तर्गत आफ्नो अर्को खेल मंगलबार पाकिस्तानसँग खेल्नेछ । युएईमाथिको जितले नेपालको आगामी यात्रामा आत्मविश्वास थपेको छ । युएई पाकिस्तान ‘ए’सँग ६१ रनले पराजित भएको थियो । उक्त प्रतियोगितामा आठवटा टोलीले प्रतिस्पर्धा गरिरहेका छन् । प्रतियोगितामा आठ टोली सहभागी छन् । नेपाल समूह ‘बी’मा रहेको छ ।
एसिया कप राइजिङ स्टार्स : भुर्तेलको अलराउन्ड प्रदर्शन, सन्दीपको घातक बलिङमा नेपालको जित

Read Complete Original Article
Published originally on हिमालय टाइम्स






