इरानमा सरकारीविरोधी हिंसात्मक प्रदर्शन गर्ने तीनजनालाई मृत्युदण्ड

तेहरान । इरानले गत जनवरीमा भएको सरकारविरोधी प्रदर्शनका क्रममा हिंसात्मक गतिविधिमा संलग्न रहेको र अमेरिका तथा इजरायलका लागि जासूसी गरेको अभियोगमा तीन जनालाई आइतबार मृत्युदण्ड दिएको छ। इरानी सरकारी सञ्चारमाध्यमका अनुसार उनीहरूलाई अदालतले दोषी ठहर गरेपछि फाँसी दिइएको हो। पछिल्ला महिनाहरूमा इरानले जनवरी प्रदर्शन र अमेरिका तथा इजरायलसँग जोडिएका अभियोगमा धेरै जनालाई मृत्युदण्ड दिइसकेको छ। यो कारबाही पनि सोही शृंखलाअन्तर्गत भएको जनाइएको छ । इरानको न्यायपालिकाका अनुसार मृत्युदण्ड पाउनेहरूमा हसन दिओबन्द, हामिद काजेमी र रेशा जंगनेह रहेका छन्। उ नीहरूमाथि कराज सहरमा हतियार, ग्रेनेड र मोलोटोभ ककटेल (पेट्रोल बम) प्रयोग गरी सार्वजनिक सम्पत्तिमा आगजनी गरेको र विद्युत् सबस्टेशनमा क्षति पुर्‍याई केही क्षेत्रमा बत्ती निभाएको अभियोग लगाइएको थियो। न्यायपालिकाले जारी गरेको विज्ञप्तिमा दिओबन्दलाई जनवरी ११ मा पक्राउ गरिएको थियो । अनुसन्धानका क्रममा उनलाई सार्वजनिक सम्पत्तिमाथिको आक्रमण तथा हिंसा फैलाउने मुख्य योजनाकारका रूपमा पहिचान गरिएको उल्लेख छ। उनकै नेतृत्वमा प्रदर्शनमा भाग लिएका अन्य १० जनालाई पनि पछि पक्राउ गरिएको थियो। अदालतले ती तीनै जनालाई मृत्युदण्डको सजाय सुनाउँदै उनीहरूको सम्पत्ति जफत गर्न आदेश दिएको थियो। सर्वोच्च अदालतले तल्लो अदालतको फैसलालाई निरन्तरता दिएपछि मृत्युदण्ड कार्यान्वयन गरिएको हो। यस घटनामा संलग्न अन्य प्रतिवादीहरूलाई भने ५ देखि १० वर्षसम्मको जेल सजाय सुनाइएको छ। रोयटर्स