अदालत र राज्यका संस्थालाई कमजोर बनाउने गतिविधि रोकौँ : रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले अदालतलगायत राज्यका संस्थाहरूलाई कमजोर बनाउने खालका अभिव्यक्ति र गतिविधि नगर्न आग्रह गर्नुभएको छ । शुक्रबार चितवनमा आफ्नो धारणा सार्वजनिक गर्दै उहाँले अदालतका विषयमा सुनेका वा लेखिएका आधारमा हचुवाका भरमा टिप्पणी गर्दा संस्थाको गरिमा र विश्वसनीयतामा असर पर्ने बताउनुभयो । अदालत, प्रहरी, सुरक्षा निकाय, निजी क्षेत्र, प्रेस, पेसागत संगठन तथा वैदेशिक सम्बन्धलगायतका संस्थाहरू कमजोर भए समग्र देश र लोकतन्त्र नै कमजोर हुने उहाँको भनाइ थियो । कमजोर लोकतन्त्रले ठूला कुरा गर्न सक्ने भए पनि प्रभावकारी काम गर्न नसक्ने उहाँले टिप्पणी गर्नुभयो । लोकतन्त्रका महत्त्वपूर्ण आधारस्तम्भलाई अभिव्यक्ति, गतिविधि र निर्णयमार्फत कमजोर बनाउने काम गर्न नहुनेमा जोड दिँदै लामिछानेले राज्यका संस्थाहरूलाई स्वतन्त्र रूपमा काम गर्ने वातावरण दिनुपर्ने बताउनुभयो । उहाँले प्रहरी र केन्द्रीय अनुसन्धान ब्युरो (सीआईबी) लाई थप सक्षम र बलियो बनाउनुपर्ने धारणा राख्नुभयो । अनुसन्धान निकाय बलियो भए पद र प्रतिष्ठामा रहेका व्यक्तिलाई समेत निष्पक्ष रूपमा अनुसन्धानको दायरामा ल्याउन सकिने उहाँको भनाइ थियो । भ्रष्टाचारमा संलग्न व्यक्तिलाई पक्राउ गरेपछि कमजोर अनुसन्धानका कारण अदालतबाट उन्मुक्ति पाउने अवस्था आउन नहुने उल्लेख गर्दै उहाँले अनुसन्धानलाई तथ्यपरक, निष्पक्ष र प्रमाणमा आधारित बनाउनुपर्ने बताउनुभयो । लामिछानेले भन्नुभयो, ‘अदालतलगायत राज्यका संस्थाहरूका बारेमा सुनेका वा लेखिएका आधारमा हचुवाका भरमा टिप्पणी गर्दा ती संस्थाहरू कमजोर हुन्छन् । अदालत, प्रहरी, सुरक्षा निकाय, निजी क्षेत्र, प्रेस, पेसागत संगठन र वैदेशिक सम्बन्धजस्ता राज्यका सबै आधारस्तम्भ कमजोर भएमा अन्ततः देश र लोकतन्त्र नै कमजोर हुन्छन् ।’ राज्यका संस्थाहरूलाई स्वतन्त्र र प्रभावकारी रूपमा काम गर्ने वातावरण दिनुपर्नेमा जोड दिँदै उहाँले प्रहरी र सीआईबीजस्ता अनुसन्धान निकायलाई पद वा प्रतिष्ठाको प्रभावबिना जोसुकैमाथि निष्पक्ष अनुसन्धान गर्न सक्ने बनाउनुपर्ने बताउनुभयो । भ्रष्टाचारमा संलग्न व्यक्तिले कमजोर अनुसन्धानको फाइदा उठाएर कानुनी प्रक्रियाबाट उन्मुक्ति पाउने अवस्था अन्त्य गर्नुपर्ने उहाँको भनाइ थियो । राज्यका अनुसन्धान गर्ने निकाय सक्षम र प्रभावकारी हुनुपर्ने उल्लेख गर्दै लामिछानेले आफूहरूले खोजेको संस्थागत सुधार पनि निष्पक्ष, सशक्त र प्रमाणमा आधारित अनुसन्धान प्रणाली भएको स्पष्ट पार्नुभयो ।